رموز................و مثل عليا

الرموز........... لا تخلو بلد من الرموز
و وجودهم يدل على جو صحى لا شك
بمرور سريع على حقب التاريخ المصريه المختلفه يمكننا ملاحظة رموز مصريه مشرفه
منذ فجر التاريخ حين وحد مينا قطرى مصر مرورا بأحمس طارد الهكسوس
و بأنتقالنا الى التاريخ الحديث سنمر على احمد عرابى و مصطفى كامل
و ليس انتهاء بسعد زغلول زعيم الأمه

و لكن من هم رموزنا الآن؟
من فى رأيك يمكن ان يصبح مثلا اعلى لك؟
و ليس بالضروره ان يكون سياسى
فلنتعرف على رموز الشباب و مثلهم العليا

الصوره من مكتبة المفيد

احوال مصريه

وفاة شاب تحت عجلات المترو

طالعتنا الصحف بخبر هذا الشاب الذى كان صاعدا الى المترو فى حين اغلقت الأبواب و ظل عالقا قدمه بالداخل و نصفه الآخر بالخارج
من المعروف ان المترو لا يمكنه السير اذا كان هناك احد الأبواب مازال مفتوحا

فكيف تحرك المترو و لم يغلق الباب بعد
يا ترى الأجهزه هى اللى مش تمام و لا السائق مش فارق معاه

اختفاء طفلتين من احدى القرى فى ظروف غامضه

اثار برنامج العاشره مساءا اختفاء طفله عمرها عامان و بعد شهرين طفله اخرى عمرها اربعة اعوام
الملفت ان والدة احدى الطفلتين تتوقع وجود عصابة سرقة اعضاء وراء اختفاء الفتاتين
و المحير ان الطفله الأخرى تم اختطافها من نفس المنطقه و بنفس الطريقه
اى انه تقصير امنى فكيف لا تؤمن منطقه بها واقعه غريبه هكذا
و كيف يتم تكرار نفس السيناريو على غفله من الأمن
كان موضوع اختفاء الأطفال و سرقة اعضائهم قد اثير فى بعض الجرائد منذ مده و بالتحديد بعد حادثة بنى مزار الشهيره
و لكن تم التكتم على الأمر فجأه
و ها هو الموضوع يعود من جديد و لا اعتقد ان الحل يكون بالتعتيم عليه مره اخرى

انقطاع المياه فى مناطق عديده فى بنى سويف و الدقهليه و مناطق مختلفه فى القاهره

يا بركة البنيه التحتيه
كل ما تيجى تكلم حد عن الواقع المأساوى يقول لأ احنا استلمنا البلد من غير بنيه تحتيه
لكن البلد دلوقتى بنيتها التحتيه زى الفل و اتكلفت عشرات المليارات
طيب آدى البنيه التحتيه طلعت زى الزفت
راحت فين بقى عشرات المليارات
يا ترى العيب فى المقاول؟


الصور نقلا عن جريدة المصرى اليوم

الفساد فوق الجميع

اول مره اكتب موضوع و اكون فى قمة غضبى
الخبر ببساطه ان هناك فتاه صغيره من اسره فقيره جدا خرجت لمشاهدة احتفلات فوز النادى الأهلى
و اثناء احتفالات مشجعى النادى الأهلى بفوز فريقهم على عدوه اللدود الزمالك ( تقولش هزم اسرائيل)
كانو يقوموا بضرب صواريخ فأصابت احداها الفتاه الصغيره
و توفيت امس
مش مهم المهم ان الأهلى هزم الزمالك
مش مهم يكون عندنا انتماء لبلدنا لكن المهم يكون عندنا انتماء للأهلى
طبعا الأهلى فوق الجميع
يعنى اقول ايه. انا مش عايزه حد يقول ده مش كان قصدهم و ده قضاء و قدر
لأ ده استهتار بأرواح الناس
هما الناس ناقصين
مش كفايه بيموتوا فى القطارات و العبارات و المياه الملوثه و الخبز المسرطن
و الدم الملوث كمان هيموتوا علشان الأهلى
على العموم انا مش موضوعى هنا اهلى و لا زمالك

و مازال الفساد مستمرا

الطامه الكبرى ان هذه الصواريخ ممنوع استيرادها و ممنوع تصنيعها
اذن اذا كانت هذه الألعاب الناريه داخله عن طريق التصدير اذن انا اتهم هنا رجال الجمارك
المتسببين فى دخولها بالفساد و احملهم المسئوليه
طيب و لما دخلت و اتهربت اين رجال الشرطة لمصادرتها
متى يرى رجال الشرطه عملهم
صحيح........................ لما يقبضوا على سفاح المعادى و يمسكوا سفاح بنى مزار و يتوقفوا عن تقفيل القضايا بالتعذيب يبقوا يشوفوا موضوع الصواريخ

ارجو ان اى اهلاوى متعصب قبل ما يزعل من كلامى يتخيل اهل البنت عاملين ايه

طيب اقول ايه

سرقة مشروعه

كانت سائره فى الشارع حين وجدت سياره تتعمد مضايقتها
لحظات وخرجت يد من السياره و تعلقت بحقيبة يدها
لم يكن امامها سوى ترك الحقيبه بعد مقاومه قليله حتى تتخلص من ذلك الموقف
و فكرت ان تلتقط رقم لوحة السياره
و لكن بلا جدوى. فالسياره كانت بلا لوحه من الأساس

هذا ما حدث لأحدى قريباتى
و ارجو الا يتسائل مغرض كيف تسير سياره بلا لوحه فى شوارع القاهره
و لا يتسائل مغرض آخر اين ذهب الماره
لحد هنا عادى جدا و مفيش مشكله
ايوه المشكله مش فى حادث السرقه لأنه قد يحدث فى اى مكان
المشكله فى اللى جاى
التفكير المنطقى انها تذهب لعمل محضر و هذا ما حدث
فى البدايه رفض الضابط المسئول عمل محضر
و لكن بعد الحاح منها و تمسكا بحقها القانونى
رضخ الضابط لها و فتح محضر
و للعلم فقد احضرت معها واسطه لعمل ذلك المحضر
المهم ان اثناء حديثها مع الضابط اكد لها ان هذا الموضوع انتشر
فأخبرت الظابط انها تعتقد ان هناك مجموعات من الشباب التى تتعاطى المواد المخدره تقف وراء ذلك!!!!!!
و لكنه قاطعها قائلا و كمان بيضربوا حقن يا مدام!!!!!!!!!!!!!!!!!!!
الله طيب لما انت عارف مستنى ايه.....................ما علينا نرجع لموضوعنا
الأفدح انه اكد لها انهم غالبا سيتركوا الشنطه- بعد سرقة ما بها بالطبع- على الطريق الدائرى.
و هذا ما حدث بعد يومين
حيث فوجئت بشخص يتصل بها تلفونيا موضحا انه وجد الشنطه على الطريق الدائرى و بها بطاقتها و اجندة تليفونات و من هنا اتصل بها!!!!!!!!!!!!!
يعنى هما عارفين ادق التفاصيل. طيب باقى ايه
الأهم انها عندما طالبته بصوره من المحضر . طلب منها المرور عليه بكره لأسباب واهيه
رضخت لمطلبه و عاودت الذهاب فى اليوم التالى. و حين طالبت بصوره من المحضر. تعللوا بأن المأمور المسئول عن الختم لم يحضر
وهكذا...........
و طبعا انا هنا مش بشكك فى كفاءة جهاز الشرطه المصرى لا سمح الله
و لا قصدى اقول انه كسول و مطنش
لأن دى مش اخلاقى
و لأن الشرطه بتسهر على راحة الشعب . و الشعب فى قلب الشرطه. و هما الأتنين فى خدمة الوطن زى ما حضراتكوا شايفين
و فى هذا الصدد يقول المطرب خالد الذكر سعد الصغير
كل حاجه هتبقى تمام سمعونى بأه احلى سلام
و لا عزاء للمواطنين