Wednesday, July 11, 2007

الفساد فوق الجميع





اول مره اكتب موضوع و اكون فى قمة غضبى
الخبر ببساطه ان هناك فتاه صغيره من اسره فقيره جدا خرجت لمشاهدة احتفلات فوز النادى الأهلى
و اثناء احتفالات مشجعى النادى الأهلى بفوز فريقهم على عدوه اللدود الزمالك ( تقولش هزم اسرائيل)
كانو يقوموا بضرب صواريخ فأصابت احداها الفتاه الصغيره
و توفيت امس
مش مهم المهم ان الأهلى هزم الزمالك
مش مهم يكون عندنا انتماء لبلدنا لكن المهم يكون عندنا انتماء للأهلى
طبعا الأهلى فوق الجميع
يعنى اقول ايه. انا مش عايزه حد يقول ده مش كان قصدهم و ده قضاء و قدر
لأ ده استهتار بأرواح الناس
هما الناس ناقصين
مش كفايه بيموتوا فى القطارات و العبارات و المياه الملوثه و الخبز المسرطن
و الدم الملوث كمان هيموتوا علشان الأهلى
على العموم انا مش موضوعى هنا اهلى و لا زمالك

و مازال الفساد مستمرا

الطامه الكبرى ان هذه الصواريخ ممنوع استيرادها و ممنوع تصنيعها
اذن اذا كانت هذه الألعاب الناريه داخله عن طريق التصدير اذن انا اتهم هنا رجال الجمارك
المتسببين فى دخولها بالفساد و احملهم المسئوليه
طيب و لما دخلت و اتهربت اين رجال الشرطة لمصادرتها
متى يرى رجال الشرطه عملهم
صحيح........................ لما يقبضوا على سفاح المعادى و يمسكوا سفاح بنى مزار و يتوقفوا عن تقفيل القضايا بالتعذيب يبقوا يشوفوا موضوع الصواريخ

ارجو ان اى اهلاوى متعصب قبل ما يزعل من كلامى يتخيل اهل البنت عاملين ايه

طيب اقول ايه

57 Comments:

At 11/7/07 3:41 AM, Blogger Amr Ahmed said...

انا شفت الموضوع في البيت بيتك

اكيد دي حاجة متفرحش اي انسان

اهلاوي زملكاوي موريتاني

الغلط موجود في مصر من الالف للياء

الله يرحمها طبعا ويصبر اهلها

وعلي فكرة رابطة الاهلي هتلم فلوس للبنت

انا عارف انه ميسواش ضفرها

بس اي مساعدة

وهو في الاخر مش ذنب الاهلي

الجاني الله يسامحه بقي

 
At 11/7/07 9:50 AM, Blogger ody911 said...

مريم


يعنى غنتى جاية تجرحينا كدة وتنكدى علينا


يابنتى صدقينى مش ناقصة نكد


طووول عمر مصر كدة


مش اليومين دوول بس يعنى


وبعدين دة إللى إنتى عرفتية


وما خفى كان أعظم











وعاااااااااااااادى بقة
أودى

 
At 11/7/07 11:39 AM, Blogger ربيع said...

هيهيهيهي
هو انت شكلك زملكاوي متعصب
الأهلاوي المتعصب لو فتح بقه في الموضوع ده يبقى بيستهبل ، طبعا الأهلاوية استغبوا آخر غباء في الماتش الأخراني ده ، و قفلوا الشوراع و ضربوا صواريخ و نيله ، و أكيد ده خطأ ، و أنا رأيي ان رباية الناس الفلوس ، بمعنى ان لو بلدنا فيها رجاله ينزلوا غرامات على النادي الأهلي عشان الجمهور يتربى شوية

 
At 11/7/07 1:17 PM, Blogger أحمد المصري said...

قولي حسبي الله ونعم الوكيل00الله يحرقهم
طول عمري بكره الكورة عشان القرف اللي بيحصل ده00كل ماشوف الناس واهتمامهم بالكورة وسجالاتهم الحوارية
كل واحد عاملي فيها شوبير -حتى شوبير منيل بستين نيلة-دمي بيتحرق أوي سايبين كل حاجة وقاعدين للكورة00الله يحرقهم كمان مرة0

 
At 11/7/07 5:17 PM, Blogger No Fear said...

السلام عليكم
أنت تعرفي المأساة الحقيقة اللي تتعب بجد ممكن تلاقي فلسطين مولعة و مش عارف فيه أية في مصر و لبنان و العراق
بس الأهم الكورة للأسف إحنا مش لاقيين حاجة سياسية تفرح و نتحد وراها فلذلك معظمنا بيفرغ إنتمائه للكورة و مش كورة بس تلاقي اللي متعصب لمغني و لا لممثل أو أي حاجة تافهة عموما و سايبين القضايا الكبري بس متنكريش إن ده بردوا بسبب الإحباط و اليأس
يعني مثلا لو تتذكري أيام الإحتجاجات علي الرسوم المسيئة للرسول عليه الصلاة و السلام و المظاهرات و الحاجات الغريبة اللي حصلت أتحداكي إن إحنا بنحاول حتي ننفذ سنة الرسول عليه الصلاة و السلام
بتبقي توجيه مقصود من الأعلام و معه جهلنا و طبعا يغلف ده كله اليأس و الإحباط
أسف للتطويل
سلام

 
At 11/7/07 7:56 PM, Blogger كراكيب عادل said...

تهون

وفعلا حجات كتير مش مهمة

الاهم الاهم منسي

 
At 11/7/07 9:25 PM, Blogger sarah la tulipe rose said...

ماهو لقوا ضحايا الحكومة قليلين الظاهر قالوا يساعدوها وي خلصوا علي بعض بدري بدري..حاجة بقيت تجيب اكتئاب و الله ,,مش عارفة احنا ايه الي جرالنا ..ايه اللا مبالاة دي؟
مش عارفة فعلا ليه بنعمل كدة في نفسنا زي مانكون عاوزين اعداء نفسنا

 
At 11/7/07 10:19 PM, Blogger شـــــهــــروزة said...

زى ايمان قنا اللى ماتت تحت ضربة الشمس انتظارا للوزير


وزى بدور اسيوط اللى ماتت تحت ايد الطبيب المخدر وقت ختانها

وزيها زى آلاف بيموتوا كل يوم من الاهمال والاستحمار المترسخ فى العقول
واللامبالاة والاستهتار بالأرواح

لدرجة جعلت قيمة أرواح البشر بمصر
لا تساوى ثمن الحبر اللى بتتكتب بيه شهادة الوفاة

 
At 12/7/07 1:13 AM, Blogger بيجاسوس المصرى said...

المشكلة اننا تركنا المشكلات الحقيقية و اصبحنا نعيش فى عالم من الهيافة الرهيبة

يعنى ايه الفائدة من الكورة والضرب و الخناق

انا اعرف يا مريم مشجع انجليزى و الانجليز معرفين طبعا بالتعصب الشديد
بيشجع تشلسى اللندنى يقولى كل علقتنا بالكورة يوم الاحد بس لما نروح الماتش او التلات او الاربع لما يكون فيه بطولة الابطال

بعدها بننسى كل حاجة علشان ما تأثرش على الشغل بتاعنا
و احنا ليل نهار بنتخانق على اللعب الفلانى والعلانى
حسبنا الله ونعم الوميل

 
At 12/7/07 12:31 PM, Blogger صاحب البوابــة said...

فساد وظلم واستهتار

رحمها الله

وتحياتي لقلمك الحر

 
At 12/7/07 3:54 PM, Blogger mariam said...

Amr Ahmed
عمرو الأهلاوى
انا عارفه طبعا انه مش ذنب الأهلى
و انا مش كنت عايزه انقد الأهلى كنادى لكن بتكلم عن سلوك مشجعين و جماهير
و ده ينطبق على كل جمهور الكره فى مصر هى جت من مشجعى الأهلى بس كان ممكن يبقى من مشجعى اى فريق تانى
كويس موضوع رابطة الأهلى ده
منور يا عمرو




----------------------------------
ody911
اهلااا اودى
للأسف مصر على طول كده فعلا
يعنى مفيش امل نتغير

منورنى

 
At 12/7/07 3:58 PM, Blogger mariam said...

ربيع
اولا منورنى
ثانيا انا مش اهلاويه و لا زملكاويه
و لا بفهم فى الكره تماما
علاقتى بها زى علاقتى باللغه الصينيه
لكن احب اقولك ان لو عملوا غرامه على النادى الأهلى
الجمهور هيعمل مظاهرات مفيش حد فكر يعملها لما اسعار كل حاجه غليت
و فوق كل ده جمهور الأهلى هيتبرع و لو بجنيه علشان النادى مش يدفع حاجه
هى دى مصر
منور



---------------------------------
أحمد المصري
انا زيك بالظبط يا احمد
بيستفزنى جدا التعصب الكروى و الأهتمام غير المبرر بها
و فوق كل ده تلاقى الناس ناسيه كل الكوارث و مستنيه الماتش
حاجه مستفزه فعلا
منورنى

 
At 12/7/07 4:01 PM, Blogger mariam said...

No Fear
و علكم السلام و رحمة الله
طول براحتك يا محمد
البلوج بلوجك طبعا
انا متفقه معاك جدا
الأهتمام غير المبرر بالكره و التعصب بيستفزنى جدا
كأن خلاص كل المشاكل اتحلت و فاضيين
منورنى


--------------------------------
كراكيب عادل
اهلا بيك
الأهم منسى فعلا
امتى نفوق مش عارفه
منور و شكرا جدا للزياره

 
At 12/7/07 4:04 PM, Blogger mariam said...

sarah la tulipe rose
صح هما قرروا يقللوا عددنا شويه علشان الزحمه
من جهة لا مبالاه مفيش اكتر من كده
امتى نفوق مش عارفه
منوره جدا يا ساره


-----------------------------------
شـــــهــــروزة
اهلاااااااا شوشو
الأرواح عندنا فى مصر
مالهاش تمن اساسا
زى ما انت قلتى كل يوم كارثه جديده
و كل يوم ضحايا جدد
و لا حياه لمن تنادى
مفيش حد بيتحرك و كأن مفيش حاجه بتحصل
منورانى دايما

 
At 12/7/07 4:07 PM, Blogger mariam said...

بيجاسوس المصرى
مقارنه ظالمه بيننا و بين الأنجليز يا معتز
لأنهم ناس عارفين قيمة الوقت و قيمة الشغل
لكن احنا طبعا مش عارفين حاجه عن المواضيع دى
احنا كفايه علينا نفكر الاعب ده هيتباع بكام و الاعب ده هيروح فين
منورنى



--------------------------------
صاحب البوابــة
طبعا عندك حق
و اى استهتار بأرواح الناس
ربنا يرحمها و يصبر اهلها
شكرا جدا لزيارتك

 
At 12/7/07 4:59 PM, Blogger امام الجيل said...

سبحان الله ولا كان الموضوع حصل اصبحت ارواح الناس ارخص شئ فى البلد دى ولا حول ولا قوة الا بالله
يعنى الواحد يا دوب سمع عن الموضوع ده بس اذا فى بلد محترم كان حصل كتير اوى

 
At 13/7/07 12:54 PM, Blogger وينكى said...

قلبى اتوجع

على فكره انا عامله تجمع بلوجرى جامد جدا بمناسبة نجاحى وتخرجى على خير
والتفاصيل على مدونتى الصغنونه..اللى من غير فذلكه

 
At 13/7/07 7:55 PM, Blogger الطائر الحزين said...

يا أختى اقول لك ايه بس

انتى بتتكلمى فى قصاص شرعى
القتل الخطأ
دية مسلمة الى اهلة

الجروح قصاص

اقول ايه بس المواضيع فى التدوينات مرتبطة ببعضها
هنا واحدة توفيت من تشجيع الاهلى
و الاخرى المغتصبة بنت 11 ربيعا وا صبحت أم

شاطرين نتكلم فى الفرعيات ونعمل لها حلقات وندوات وبلا ازرق
ربنا يرحمنا

 
At 13/7/07 11:11 PM, Blogger micheal said...

أولا..تصحيح
شعار الاهلي فوق الجميع ليس معناه أن يكون الاهلي فوق القانون و فوق الانديه الاخري و خلافه و انما هو شعار قصد به الراحل العظيم صالح سليم بأن الاهلي كمؤسسه أهدافها و نجاحها فوق أي أهداف شخصيه
بالنسبه للحادثه فهي مؤسفه فعلا و لازم يكون فيه توعيه لكل جمهور مصر بأهميه احترام فواعد الذوق و اللياقه عند الاحتفال
تحياتي لكي

 
At 13/7/07 11:14 PM, Blogger whyme said...

المشكله ان الانتماء للاهلى بقه المنفذ الوحيد و الشكل الوحيد الموجود عليه الانتماء فى مصر
المهم ده مش موضوعنا احنا موضوعنا هوه الاستهتار والفساد الى بقى معشش فى كل حته فى مصر و المشكله كمان فى الشباب التافهه الى محتاجه توعيه الى مستعده تموت فداء الاهلى و تموت ناس معاها كمان

هيه فعلاً مش مشكله الاهلى و لكنها مشكله توجيهه الانتماء اولاً و ثانياً مشكله فساد و ثالثاً مشكله فهم خاطئ للحريه و اظهار معالم الفرح


غيظك واصلنى و ربنا يرحمها و وبصبر اهلها على المصيبه دى

تحياتى

 
At 13/7/07 11:41 PM, Blogger whyme said...

معلش نسيت اشكرك جداً على اضافه موضوع النداهه عندك شكراً ليكى ولاهتمامك


تحياتى يا صديقتى العزيزه

 
At 14/7/07 12:21 AM, Blogger مصرى said...

حاجة توجع القلب

 
At 14/7/07 1:16 AM, Anonymous sa3ed al masry said...

walahy kol 3aza2na l2osret al bent laken ally 7asal malosh da3wa belnady al ahly lakn belwa3y al sha3by wel gamahery al ahly fok al game3 she3ar bey7ebo we bye7taremo al ahly laken al nady wel adara mesh mas2ola 3an ally 7asal la2n de tasarofat men kela 3'er mas2ola men al gamaher we 3ala fekra al 7amd llah an gamaherna ked we ab2o as2alo 3an al holegens (al gomhor al anglezy ally mamno3 yedkhol eurobe fe al betolat)
we ya rab tekon akher hadsa men al no3 da we rabena ye7faz al game3
we welad al nas fo2 al game3

 
At 14/7/07 6:50 AM, Blogger Samir said...

انا في قمة حزني لهذا الأمر. بس على العموم احنا عندنا كام مليون طفل وحوالي 100 فريق كورة. لو كل فريق هيفوز مرة في الشهر ويموتله طفلين ثلاثة. ياه دي تبقى حاجة جميلة خالص.

للأسف احنا بنفوق من سباتنا العميق بالكوارث. نفوق للحظات نقول كلمتين قال يعني مش نايمين على ودانا ونرجع الى حالة النوم العميق بانتظار مصيبة جديدة.

 
At 14/7/07 8:56 AM, Blogger أحمد سلامــه said...

انا مش عارف هي كمان ناقصة
يعني حتى في الماتشات الناس بردو بتموت
البلد دي بقت فيها طرق عجيبة في الحوادث اللي بتحصل للبني ادمين
صاروخ اهبل يقتل طفله
والحيوان اللي ضرب الصاروخ ده اتعاقب ولا طلع مالوش في السياسة
أحب اضيف على كلامك لاي أهلاوي متعصب واي زملكاوي متعصب واي انسان غبي شايف ان في كورة اساسا في بلدنا مستاهلة التعصب :
خلو عندكم دم
البلد مش ناقصه
عفوا لطولة اللسان

 
At 14/7/07 4:00 PM, Blogger tota said...

مانو

انا معاكى فى كل كلمة قلتيها مش لازم علشان نفرح ونحتفل نسيب ضحايا
لما بيت يغلفه الحزن علشان فقد وردة كانت نور عين اسرتها عملنا ايه بالفرحة دى

مع كل عيد وانا بسمع الصواريخ والبمب وغيره قلبى بيكون مقبوض لان عارفة ان لازم هيكون فى حادثة هتصيب حد ايه قيمة الحاجات دى مش هنعرف نفرح من غيرها
الحقيقة ان الفساد من اول بلادنا لاخرها ومفيش حتة فى مصر مفيهاش خلل
يا اما كلنا نطلب نتغير يا اما نسكت على كل حاجة ونبقى عارفين اننا فى يوم من الايام هنكون ضحايا بس مش بس ضحايا الحوادث ضحايا سكوتنا كمان

 
At 14/7/07 4:23 PM, Blogger saso said...

يمكن باقول قضا ربنا لما تحصل حادثة حتي لو فيها اهمال
لكن ماتش
ابني يموت علشان ماتش ولا حرب ولا حادثة طريق ولا حريق
ده ماتش

واستنيت اي رد رسمي .. مفيش.. اي عقاب مفيش
جمهور فرحان يموت بنت

والصواريخ اللي طول النهار بيصرخوا انها ممنوعة..جت منين دي مش المفروض ان محظور استيرادها

بمناسبة حظر استيراد الصواريخ.. في عيد الشرطة اللي فات كوبري عباس كان كله صواريخ..هي الصواريخ ممنوعه علي الناس مش علي الحكومة مع ان كده كده بتنضرب في الشوارع .. محدش فاهم

ربنا يرحم البنت ويرحم عيلتها من اللي حاسين بيه

 
At 14/7/07 4:29 PM, Blogger momken said...

انا تابعت الموضوع ده على بعض الفضائيات
حاجه تكسف...
حتى الفرح مش بنعرف نفرح
عاشين غلط بناكل غلط وبنشرب غلط
بنشجع غلط
مش بنعرف نتجوز ولا ننتخب ولا نحكم
مش بنعرف نسوق مسكروباصات
ومش بنعرف نركب مواصلات
حتى مش بنعرف نفرح
ويوم مانفرح نزعل غيرنا
حسبى الله ونعم الوكيل
تحياتى

 
At 14/7/07 7:32 PM, Anonymous mohamed gado said...

اهو ده اللى بيجى من ورا التشجيع الغير متحضر للكوره
والتعصب الاعمى لمشجعينها
انا مش عارف الكوره دى عامله فى الناس ايه
لكن انتى تناولتى الموضوع بوجهة نظر جميله وهى فساد رجل الاعمال اللى استورد الصواريخ دى وفساد الجمارك اللى سمحت بدخولها وفساد الامن اللى ماصدرهاش
ولسه ياما هانشوف
مدونتك جميله وبوستاتك حلوه
تحياتى

 
At 14/7/07 11:08 PM, Blogger mohamed said...

حسبنا الله ونعم الوكيل

 
At 15/7/07 12:43 AM, Blogger ibn nasser - ابن ناصر said...

لا حول الله انا شفت الموضوع في البيت بيتك وبكيت لي حال الطفله واهلها ..


تحياتي

 
At 15/7/07 12:44 AM, Blogger ibn nasser - ابن ناصر said...

اه بالحق هنشوف نادي المبادء والزمامير هيعمل ايه

تحياتي

 
At 15/7/07 2:19 AM, Blogger عازف الناى said...

لاحول ولا قوه الا بالله
تصدقى انتى جيتى على الجرح
الصواريخ دى دخلت البلد ازاى وبكميات مهوله ؟؟؟؟؟؟

 
At 15/7/07 2:36 AM, Blogger micheal said...

ابن ناصر
الاهلي نادي القيم و المباديء و دي حقيقه مفروغ منها و ثابته بالتاريخ و قد قامت رابطه مشجعي النادي الاهلي بتخصيص مبلغ لعائله هذه الفتاه في لفته انسانيه كريمه منهم
تحياتي

 
At 15/7/07 2:51 AM, Blogger mariam said...

امام الجيل
للأسف يا امام الجيل
الأرواح هى ارخص حاجه فى مصر
اكيد لو فى بلد محترم الموضوع كان مش هيعدى على خير
منورنى


---------------------------------
وينكى
وسنكى الجميله
الف الف مبروك
و ان شاء الله هحاول آجى

 
At 15/7/07 2:55 AM, Blogger mariam said...

الطائر الحزين
للأسف القانون فى مصر
مجرد حبر على ورق
الكوارث اصبحت فى كل مكان
طبعا موضوع الفتاه ذات ال11 ربيعا
كارثه و مصيبه بكل المقاييس
فين القانون اللى يجيب للناس حقوقها
شرفتنى بالزياره


-------------------------------
micheal
واضح يا مايكل انك اهلاوى
للأسف يا مايكل
انا مش ضد الأهلى و من حق الناس تفرح
لكن يكون عندهم مسئوليه
يعنى لو انا هفرح و اموت لى واحد يبقى انشالله ما فرحت
شكرا على تصحيح المعلومه
اصل انا مش ليا فى الكره ابدا
منورنى دايما

 
At 15/7/07 2:58 AM, Blogger mariam said...

whyme
كلامك تمام يا ايلارى
لدرجة ان فى ناس عندها انتماء شديد جدا للأهلى فى حين لا تكن ادنى المشاعر لبلدها
طبعا لا داعى للشكر
موضوع النداهه حلو و يستاهل
منورنى


---------------------------------
مصرى
طبعا حاجه توجع القلب
هنقول ايه
منورنى

 
At 15/7/07 3:04 AM, Blogger mariam said...

sa3ed al masry
انا مش موضوعى هنا هجوم على الأهلى
لكن اذا كان الأهلى و مشجعيه شعارهم الأهلى فوق الجميع
فأنا شعارى ارواح الناس فوق الجميع
شكرا لزيارتك



--------------------------------
Samir
حقيقى كلامك عجبنى جدا
احنا فعلا بنفوق علشان ننام تانى
و لا داعى للقلق
فالمصائب عندنا ماشاء الله
نورت

 
At 15/7/07 3:07 AM, Blogger mariam said...

أحمد سلامــه
مفيش طولة لشان و لا حاجه
بالعكس كلامك فى محله
و انا متفهمه انفعالك لأنى اشاركك الشعور تماما
شرفتنى بالزياره


------------------------------
tota
اهلاااااااا توتا
وحشانى جدا جدا
ازيك و عامله ايه؟
يا رب تكونى بخير

المصيبه يا توتا فى سكوتنا اللى هو سبب كل الكوارث اتمنى اننا نفوق

نورتينى جدا جدا و سعيده بزيارتك فوق ما تتخيلى

 
At 15/7/07 3:11 AM, Blogger mariam said...

saso
اهلا ساسو
مختفيه فين؟
المصيبه يا ساسو
ان الصواريخ ممنوعه على الورق بس زى كل حاجه فى بلدنا الجميله
شوفى مثلا رمضان و العيد
و كمية الصواريخ و البمب
فين المنع بقى
هى دى مصر
منوره يا جميله


---------------------------------
momken
فعلا حياتنا كلها غلط فى غلط
لكن عندك حق اننا
لما نفرح نزعل غيرنا
منور

 
At 15/7/07 3:13 AM, Blogger mariam said...

mohamed gado
انا كمان بكره جدا
التعصب الأعمى
لكنه للأسف موجود بشده فى مصر
اشكرك جدا على كلامك ده
و بجد شكرا على ذوقك
شرفتنى بالزياره


---------------------------------
mohamed
هى دى احسن جمله
فى الموقف ده
حسبنا الله و نعم الوكيل
نورت

 
At 15/7/07 3:18 AM, Blogger mariam said...

ibn nasser - ابن ناصر
ليك حق تبكى طبعا
ده موضوع يدمى القلوب
بالنسبه للنادى الأهلى مهما عمل هيعمل ايه
مش هيقدر يرجع البنت
لكن رابطة مشجعى الأهلى هتجمع لأهلها تبرعات
شرفتنى بالزياره


-------------------------------
عازف الناى
للأسف اللى حصل بيأكد
ان القانون فى مصر مجرد كلام على ورق
و غير قابل للتنفيذ
نورتنى

 
At 15/7/07 3:21 AM, Blogger mariam said...

micheal
اعترف يا مايكل ان جمع التبرعات لفته كريمه من مشجعى الأهلى
لكن للأسف يا مايكل
الفلوس حتى لو جمعوا مليون جنيه
مش هتعوض اهل البنت عن بنتهم
و اؤكد لك اننى لا انقد هنا النادى الأهلى كنادى
بالعكس انا قلت فى البوست ان المشجع ده كان ممكن يكون من الزمالك او الأسماعيلى او غيرهم
انا بتكلم عن سلوك مشجعين
من كل الأنديه
منورنى على طول

 
At 15/7/07 9:53 AM, Blogger The Alien said...

أنا بعد الماتش دا شفت حاجات غريبة
الناس فعلا نفسها تفرح وتتبسط
وما بتصدق تلاقي حاجة حلوة عشان تهيص
المشكلة إننا لما بنعمل حاجة عمرنا ما بنراعي بعض
أو ناخد بالنا من الأخر وحقوقه
فتلاقي اللي ماشي ف الشارع بالعربية وشغال يدي ف كلكسات ومش مهم الناس اللي حواليه ف الشارع
هو دا اللي حصل
جماهير مبسوطة ... يبقي نضرب صواريخ ومش مهم حاجة

لازم نتعلم إن حريتنا تقف عند حرية التاني
تحياتي

 
At 15/7/07 1:00 PM, Anonymous إبراهيم محسن said...

أهلاوي ايه بس وكلام فارغ ايه
دي حياة بني آدم
انا أهلاوي
طيب وايه يعني
آل يعني هدخل الجنة بده

الموضوع مؤلم ويستحق وقفة ومن جماهير الكوره كلهم
لازم نفهم أن حياة الانسان مش هدر

ربما ننتهي من كل هذه المشكلات بأن تحتلنا دولة متقدمة
الصين مثلاً
تبقى الحياة حلوة
:)
ساعتها هشجع شانغاهاي

آآآآآآآآآآآآآآآآآه يا بلد
سوري لو كنت اتكلمت بشكل مش لائق
اصلي اتخنقت حقيقي

 
At 15/7/07 3:02 PM, Blogger micheal said...

ربنا يصبر أهلها و لابد من منع عذه الصواريخ اللي بقت منتشره في كل حته بما فيهم كوبري قصر النيل -بعد منتصف الليل- قبل الاستاد
تحياتي لكي

 
At 16/7/07 1:48 PM, Blogger علاء said...

ده موضوع التجمع ياريت أعرف رأيك

المدوّن خانة

 
At 16/7/07 11:19 PM, Blogger Dr.TANTAWY said...

بصراحه يا مريم الموضوع معدش فارق

اعتقد انك لو نزلتي اي مستشفى هتشوفي مآسي كتير زي دي .. لكن المشكله ان التلفزيون لما بيهتم بقضيه بيكبرها و ينفخها عشان يبقى شكلها مهم والاعلام يهتم بيها .. انما غير كده .. هيه بالنسبه لهم قضيه زي اي قضيه .. قصه و هتعدي يعني ...الواحد بقه بيشوف كميه ناس (بتموت) يوميا اكتر من المغنيين الجداد اللي بيطلعوا في ميلودي و مزيكا .. الموضوع بقه مقرف و مقزز لأقصى درجه .. لكن هيروحوا من ربنا فين ؟؟ ربنا موجود .. و كبير

 
At 17/7/07 10:39 AM, Blogger ياسر سليم said...

قولى حسبى الله ونعم الوكيل

مدونتك تستحق الزيارة

وبالنسبة للكورة

فأنا بعد ماتش الأهلى والزمالك

كتبت بوست بعنوان

انا والكورة واسبانيا

ارجوا انك تقرية

تحياتى

 
At 17/7/07 4:56 PM, Blogger مسلم said...

ما هي الكورة مصيبة من المصايب اللي متوهانا عن طريقنا
انا بقول ده رغم اني بحب الكورة لكن فرق بين اني احب الكورة وبين انها تغيبلي عقلي

 
At 18/7/07 5:41 PM, Blogger semsem said...

يانهار ابيض
ازاى ده
حسبى الله ونعم الوكيل فى كل اهلاوى او زملكوى او حتى مريخى متعصب وبيعمل ده

وافوضى امرى الى الله

 
At 18/7/07 7:25 PM, Blogger nefertiti said...

visit my new blog www.crazynemo.blogspot.com

 
At 18/7/07 9:02 PM, Blogger mariam said...

The Alien
هى دى المشكله
لازم كل حد يعرف ان حريته تتوقف
عند حرية الآخرين



--------------------------------
إبراهيم محسن
انت متكلمتش بشكل غير لائق و لا حاجه
ليك حق تتخنق طبعا
اخبار ماتشات شنغهاى ايه؟
نورت

 
At 18/7/07 9:03 PM, Blogger mariam said...

micheal
عندك حق يا مايكل
اللى بيحصل على كوبرى قصر النيل ده كمان
مش هيوقف غير لما تحصل مصيبه
منورنى


--------------------------------
علاء
اشكرك جدا
على دعوتى للمشاركه فى تاموضوع

 
At 18/7/07 9:06 PM, Blogger mariam said...

Dr.TANTAWY
عندك حق طبعا يا طنطاوى
لكن حياة الناس فى مصر
اصبحت رخيصه جدا
و دى مشكله كبيره
منور


---------------------------------
ياسر سليم
شكرا ليك على زيارتك
و شكرا على رأيك
انا قرأت الموضوع انا و الكوره و اسبانيا و عجبنى فعلا

 
At 18/7/07 9:07 PM, Blogger mariam said...

This comment has been removed by the author.

 
At 18/7/07 9:08 PM, Blogger mariam said...

مسلم
انت قلت المفيد
حب الكوره من غير ما تغيب عقلك
هو ده الكلام
نورت


-----------------------------------
semsem
عندك حق
هو التعصب اللى مودينا فى داهيه
امرنا لله كلنا
نورتينى



--------------------------------
nefertiti
i did
and thank you for inviting me
to visit your blog

 

Post a Comment

Links to this post:

Create a Link

<< Home