Monday, March 05, 2007

الأمن و الأمان



مصر بلد الأمن والآمان


مقوله يمكن سماعها طوال الوقت


و لكن هل مازالت مصر بلد الأمن و الآمان؟


قد تكون العبارة مقبولة على حسب فهمنا لها


فلو تكلمنا عن نقطة الأمن. هل مصر بلد الأمن


مصر من الدول القليلة في العالم التي يسيطر الأمن على كل قضاياها الحيوية والغير حيوية


فأي قضيه أو مشكله يتم تحويل ملفها فورا ليكون في يد الأمن


كما إن لا يخفى على احد أن العامل المشترك بين كل شوارع مصر من شرقها إلى غربها


هي عربات الأمن المركزي


يعنى من الآخر مصر بلد الأمن. مشيها الأمن




طيب مصر بلد الأمان؟


من الطبيعي أن تحدث حوادث و جرائم في كل مكان في العالم. و قد تثير الخوف أو الفزع


و لكنها عاده تنتهي بمجرد العثور على الجاني و تقديمه للمحاكمة


بينما قد يحدث نفس السيناريو في مصر مع اختلاف بسيط


و هو انه قد لا يتم العثور على الجاني و بالتالي عدم محاكمته


فمثلا لا يمكن حصر القضايا المفتوحة في مصر


يكفى أن نتذكر أن الجاني الحقيقي في مذبحة بنى مزار لم يتم العثور عليه بعد


و ماذا عن سفاح المعادى؟ لازال حرا طليقا


و قس على ذلك قضايا أخرى


إذن مصر بلد الأمان


طبعا بما انه ليس من السهل دائما التوصل للجناة الحقيقيين


يبقى فى أمان للجناة


فالجملة لم تحدد أمان لمين بالظبط


يعنى نستنتج في الآخر إن مصر بلد الأمن و الأمان


و كل شخص له الحرية في تعريف الأمن و الأمان الخاص به


41 Comments:

At 5/3/07 4:03 PM, Blogger يا مراكبي said...

للعلم بالشيء

الأمن = Security

الأمان = Safety

وبس كفاية كدة .. من التفسير ده ممكن تعرفوا إن مصر بقت بلد الأمن والأمان وألا لأ

مش كده وألا إيه؟

 
At 5/3/07 5:22 PM, Blogger micheal said...

صدقيني يا مريم دة كلها شعارات زي أن مصر صاحبه الرياده مع أن معظم الدول اللي ورانا سبقتنا
اللقاء القادم للمدونيين يوم الجمعه القادمه..عاوزين نشوفك..لمزيد من التفاصيل
http://amyasser.blogspot.com/
تحياتي لكي

 
At 5/3/07 5:43 PM, Blogger شادي فايد said...

اتفق مع مايكل

بلد شعارات صحيح
---------
الامان امان القلب
-----------
بغض النظر عن الحكومة
وامنها و امانه

هل انت تشعري بالامان في مصر
؟؟
انا بشعر بالامان بس مش عارف ايه سبب الشعور ده

 
At 5/3/07 7:29 PM, Blogger Dr. Tantawy said...

بصراحه :) رأي مش هيعجب حد

بس عموما موضوع الامن انا موافق على رأيك تماما

اما موضوع الامان :) ف برغم كل البلاوي اللي عندنا ف احنا من أمن دول العالم .. بجد مش هزار .. و السبب مش الشرطه اللي حميانا و الحراميه اللي مش بيسرقوا .. بالعكس .. الشرطه في الكازوزا و الحراميه كتير .. بس الناس نفسها هيه اللي حاميه بعض وواخده بالها من بعض .. و اللي يعيش في اوربا او اميركا هيحس بالكلام ده

ربنا يكرمنا :) و يدينا على قد نيتنا و بس ههههه

 
At 5/3/07 7:53 PM, Blogger مـحـمـد مـفـيـد said...

مريم
كنا نعتقد ذلك قديما انما الان اصبحت بلد الامن المركزي المتواجد بكثه في الشوارع
ولا تشعري بالامان في اي من جانتها

 
At 5/3/07 8:48 PM, Blogger IRC President said...

دايما بقول على الحوار ده
إن مصر مش بلد الأمن والأمان

مصر بلد أمن الدولة

 
At 6/3/07 3:29 AM, Blogger raspoutine said...

دعوة عامه لكل المدونين المصريين لحضور اللقاء الثالث الذى تحدد موعده من قبل المشرفين عليه والمؤسيسن له


وذلك يوم


الجمعه الموافق 9/3/2007


بدار الاوبرا المصريه


كوفى شوب الابداع


بجوار دار الابداع بداخل الاوبرا


والدخول للمكان من البوابه الخلفيه للاوبرا امام النادى الاهلى


والحضور بالملابس الشتوية


واوجه الدعوة خاصة الى الاخوات المدونات


لحضور اللقاء لان لحضورهم دور فعال فى نجاح تلك اللقاءات

وشكرا
طبعا كلامى ده مش محتاج ترجمه
انا واحد من ضمن ناس بتنظم للقاء الشهرى ده
ياريت تشاركينا اللقاء لانكم ليكم دور مهم اوى

 
At 6/3/07 4:22 AM, Blogger No Fear said...

السلام عليكم
أنت أتكلمتي في موضوع مضايقني جدا الحقيقة أنا أمبارح صحيت من النوم للأسف علي خناقة في الشارع شباب عمالة تحدف طوب علي المحلات و الناس و شباب معها مطاوي و مقلكيش كم الشتايم اللي أتقالت
اللي خوفني أكتر أن الموضوع كان عشوائي يعني مش حد بيتخانق مع حد لا مجموعة و مجموعة تخيلت كده أختي أو والدتي في الشارع في الوقت ده و واحد متخلف عمل بالمطواة شمال و لا يمين جت فيهم لا قدر الله أو أي حد مالوش لازمة أية هيكون شعوري ساعتها
اللي يضايقك الختاقة دي أولا بسبب بنت مش محترمة تقريبا هي كانت موجودة و قالت كلام من اللي قلب هالة سرحان بيحبه
ثانيا الخناقة قعدت حوالي ربع ساعة تدوري علي أي مخبر حتي مش موجود
هأقول أية بس
ربنا يهدينا جميعا
أسف للإطالة
سلام

 
At 6/3/07 11:36 AM, Blogger Human said...

بلد الأمن والأمان .....اعتقد ده ماظهرش في يوم وليله ....مصر من زمان وهي كده ..الجيوش هي اللي بتتحكم فيها ..وطول عمرها في حروب ..يمكن لمكانها الجغرافي؟

 
At 6/3/07 4:53 PM, Blogger The Alien said...

حلو تحليلك
أنا معاكي إن مصر بلد اﻷمن المركزي
اللي وظيفته يأمن الحكومة
واﻷمان ولو كان موجود بس بيقل
لأن اﻷمان بييجي من الناس
ومع الأسف
الناس ف شوارعنا إتغيرت

تحياتي

 
At 6/3/07 5:29 PM, Blogger mano said...

يا مراكبي
خلاص الموضوع كده مجاوب نفسه
انت جبت من الآخر
منورنى دايما


--------------------------------
micheal
فعلا حكاية مصر و الرياده دى مضحكه جدا
ان شاء الله هحازل آجى لقاء المدونين
اشكرك على الدعوه يا مايكل
و هحاول ان شاء الله

 
At 6/3/07 5:36 PM, Blogger mano said...

شادي فايد
مقدرش اقول انى لا اشعر بالأمان
فى مصر
و طبعا طبيعى انك تشعر بالأمان
لكن ماذا عن سكان المعادى مثلا
بالتأكيد لا يشعرون بالأمان




--------------------------------
Dr. Tantawy
مين قال ان رأيك مش هيعجب حد
رأيك يهمنى فى كل الأحوال
انا موافقه ان الأمان بمصر جيد بالنسبه لدول اخرى
و انا عن نفسى اشعر بالأمان فى الشارع
مش بنكر ده
لكن تخيل مثلا سكان المعادى او عزبة شمس الدين
هل يشعرون بالأمان؟

 
At 6/3/07 5:38 PM, Blogger mano said...

مـحـمـد مـفـيـد
الأمن المركزى
اصبح للأسف من معالم مصر
شكرا للمرور



--------------------------------
IRC President
انت عندك حق فعلا
و الأمن نفسه اصبح من معالم مصر
شكرا لزيارتك

 
At 6/3/07 5:45 PM, Blogger mano said...

raspoutine
اشكرك يا ايمن على الدعوه دى
و انا يشرفنى الحضور
ان شاء الله هحاول آجى


--------------------------------
No Fear
و عليكم السلام
فينك من زمان يا محمد
اللى انت قلته
للأسف بيتكرر كتير
و كل يوم لكن محدش بيحاول يحل المشكله
و الموضوع مش صغير فعلا
نورت

 
At 6/3/07 5:52 PM, Blogger mano said...

Human
تفتكر دى مشكله قديمه
يعنى لم يكن هناك امن و امان ابدا
مش عارفه اقول ايه
شرفت بالزياره


-------------------------------
The Alien
انت قلت نقطه مهمه
الناس اتغيرت
فعلا احنا مش زى زمان
نورت يا بشوى

 
At 6/3/07 5:57 PM, Blogger frozen love said...

الامان لمين فعلا

السؤال ده حيرني شوية لما فكرت فيه من زاويتك

بلد معدتش افهم فيها اي حاجة في اي حاجة


تحياتي

 
At 7/3/07 8:17 AM, Blogger yara said...

مصر بقت بلد العملاء
يعنى تخدم أى حد إلا ولادها تحافظ على كل حد ماعادا اللى بجد خايفين عليها

هى ديه مصر
http://egyptianoutlaw.blogspot.com/2007/02/blog-post_14.html

 
At 7/3/07 8:53 AM, Blogger sarah la tulipe rose said...

بلد الامن طبعا
وبلد قوات الامن طبعا
وعربات الامن طبعا
ورجال الامن بالطبع
حد عنده شك؟
تحياتي يا مريم اخبارالدرسة ايه؟

 
At 7/3/07 7:40 PM, Blogger tota said...

مانو
هو الموضوع مهم والامن فيه يختلف عن الامان
الامن نوعين :المفروض والامن الداخلى
الامن المفروض هو الذى تتبناه الحكومة فى صورة الشرطة حامى الحمى وبالطبع هذا الجزء ضائع تماما ولا يوجد تحريات ولا حماية ولا خدمة للشعب كله عبارة عن قهر وتعذيب وتقفيل قضايا بالصدفة او التعذيب للحصول على الاعتراف سيد الادلة
الامن الداخلى هو ان مازال الشعب المصرى عنده نزعة داخلية ما زال الناس بخير ويمكنك ان تسيرى فى وقت متأخر دون فزع او حمل سلاح
الارشادات فى الخارج ان لا تحمل نقود كثير ان لا تحمل البسبور انت معرض للسطو فى اى وقت لا تخرج منفرد حاجات كتيرة مش موجودة فى مصر
الامان هو شعور راحة فى بلدك اكيد منبعه الاول هو الامن لكن منبعه الثانى هو عاطفة غريبة وطيبة الشعب فلا تملكى غير احساس بالامان وانتى فى كل مكان فى مصر من بيتك وكليتك وشغلك
هو ده فكرى عن الامن والامان
تحياتى

 
At 8/3/07 9:00 AM, Anonymous حسن محمود said...

احم احم
مصر كانت ومازالت وستظل بلد الأمن والأمان
بجد مش شعارات
سيبك من السلطات الحاكمه
وسيبك من القبضة البوليسية المسيطرة على كل مجريات الامور فى مصر
الأمن والأمان جايين من موقع مصر
فى أراضى ربنا بارك فيها و منها مصر
وفى أراضى زيها زى أى أرض
أما بقى موضوع السيطرة الأمنية دى قصة تانيه
اذا الحاكم عسكرى فطبيعى الأمن هو اللى يسيطر
سلام

 
At 8/3/07 5:18 PM, Blogger mano said...

frozen love
انا مش كان قصدى
ان مافيش امان قوى
لكن كنت بنظر للموضوع
من ناحية تانيه
منورنى دايما


---------------------------------
yara
مش هعترض على كلامك يا يارا
لأنه بيعبر عن واقع بجد
اشكرك على وضع لينك الموضوع
و انا اطلعت عليه
شكرا للمرور

 
At 8/3/07 5:25 PM, Blogger mano said...

This comment has been removed by the author.

 
At 8/3/07 5:26 PM, Blogger mano said...

sarah la tulipe rose
مفيش حد عنده شك فى كده
يا ساره للأسف
اما بالنسبه للدراسه
ليه الأحراج ده؟
شكرا على سؤالك يا جميله
منوره دايما



--------------------------------
tota
اهلا يا توتا
بجد بفرح لما بشوف اسمك
طبعا تعليقك عميق و جاب المفيد
صدقينى انا لم اقصد انى لا اشعر بالأمان
لأ انا اشعر به
لكن سكان المعادى مثلا و عزية شمس الدين
اكيد لا يشعرون به
الشعب المصرى طيب فعلا
و اهم ما يميز المصريين هو حرصهم على بعض حتى بدون سابق معرفه
منوره بجد




---------------------------------
حسن محمود
طبعا رأيك يهمنى جدا
انا لم اقصد اننى لا اشعر بالأمان فى مصر
لكن اقصد ان هناك اشياء كتير اختلفت
عن الماضى و لا شك اننا نشعر بالأمان فى الشارع
على الأقل اكثر من دول كتير
لكن هناك اشياء ناقصه ايضا
اشكرك على زيارتك
منورنى دايما

 
At 8/3/07 7:32 PM, Blogger Sharm said...

احنا بلد الامن فعلا

الشرطة العسكرية و الشرطة المركزية و قانون الطوارئ

 
At 9/3/07 2:41 AM, Blogger bluesky said...

مصر بلد الامن و الامان
اعتقد انه كان شعار للسياحة فقط
يعني بنضحك على السياح عشان يجوا يسيحوا عندنا
اعتقد يا مانو هما ما يقصدوش المصريين في الكلمة دي

 
At 9/3/07 10:16 AM, Blogger smraa alnil said...

مريووووووووم

احنا بلد بتاعت شعارات صحيح

بجد افضل شئ فيكي يا مصر الشعارات مصر بلد الحضارات
مصر ام الدنيا
مصر الامن والامان

وكل شعار لو دقنا فيه هنلاقيه لا اساس له من الصحة

مصر بلد الحضارات هاتيلي امارة غير نقوش الفراعنه

الحمار مربوط في اليافطة
الزباله مرمية ادام المدارس
كلنا بنسرق في بعض
مصر ام الدنيا

تعالي سافري بره كدةهتلاقي كل بلد مطلعه لقب علي نفسها تحسي ان مصر دي ولا حاجة
انا بقولك كدة من واقع سفري لدولتين عربيتين
وبعدين مصر بتعمل ايه للدول اللي بره عشان تبقي هي ام الدنيا
يمكن اللقلب دة كان زمان واقعي لكن دلوقتي بقي يضحك

والامن والامان انتي اتكلمتي عنه بما فيه الكفاية
يكفي اني اقولك اني بمشي في الشاراع خايفة
هتيجي النهاردة ماشي

 
At 9/3/07 5:16 PM, Blogger micheal said...

تحياتي لكي و لكل فتاه و امراه في يوم المرأه العالمي مع تمنياتي بتحسن أحوال المرأه في جميع الاقطار العربيه

 
At 10/3/07 3:13 PM, Blogger mano said...

Sharm
هو ده بالظبط اللى كان قصدى عليه
و لا ادعى انه لا يوجد امان اطلاقا فى الشارع
و لكنه منقوص الى حد كبير
شكرا للمرور



---------------------------------
bluesky
فعلا يا جميله
الامان مش لينا
و يمكن ده كلام فعلا للأستهلاك المحلى
نورتى

 
At 10/3/07 3:15 PM, Blogger mano said...

smraa alnil
فعلا يا انوج احنا بلد شعارات
و كل شعارتنا مزيفه
انا متفقه معاكى ان الأمان قل فى الشارع و اصبح منقوص بدرجه كبير

انا جيت امبارح يا انوج و سعيده فعلا انى شفتك يا جميله



----------------------------------
micheal
شكرا يا مايكل على ذوقك
و اتمنى ان تحصل المرأه على باقى حقوقها

 
At 11/3/07 3:24 AM, Blogger MoHaMeD HoSSaM said...

مصر ممكن تكون بلد الملوخية والبدنجان مش بلد الامن والامان

 
At 11/3/07 4:02 AM, Blogger الدبور said...

توضيح بخصوص البوست بتاعي اللي عمل قلق وزعل ناس مني انا بحترمهم وبحبهم
تم توضيح وجهه نظري في بوست منفرد
اقريه وقولي ليا رايك ؟
رايك يهمني

تحياتي
الدبور

 
At 11/3/07 5:38 PM, Blogger مادو said...

الأمان
يااااااااااااااه
لسه فيه حد بيتكلم في الموضوع ده
بصي يا مانو الموضوع مهم بجد و الحكاية فاقة كل تحمل لكن أولا مش جديدة احنا اتعودنا بقى منظر عادي جدا و متعارف عليه ثانيا مين اللي يملك القدرة على التغيير أنا مش يساري و لا محبط لكن الموضوع فعلا اكتسب عادية حاجات كتير قوي في حياتنا

 
At 12/3/07 3:34 AM, Blogger hosnysoliman said...

ابنتى مريم انا اول مرة ادخل المدونة بتعتك بكل اسف كنت اتمنى ان اتعرف عليكى قبل كده واضح العقل والاتزان فىالكلام واضح كمان الاتزان فى التناول ومعقولية الراى وسلاسة السرد..احيكى ولفت نظرى روح شخصيتك عندما كنت اتكلم وارى الايماءة من راسك تايدا لما اقول..حا قلك واحدة من الاسباب التى دفعتنى فى الاستمرار فى الكلام اشكرك واتمنى ان يكون شبابنا على شاكلتك واتمنى ان اسمع منك رد فعلك على هذا اللقاء ولو مع ردك على التعليق اذا كان هناك نية للرد مع امل التنوية لى على مدونتى لان الامور اختلطت عليا
واشكرك مرة اخرى

 
At 12/3/07 2:41 PM, Blogger mano said...

MoHaMeD HoSSaM
كل شىء جايز فى مصر
بلد اى حاجه غير الأمن و الأمان
شكرا للزياره


---------------------------------
الدبور
اشكرك على طلب رأيى
انا لم اقرأ البوست القديم
لكن قريت الجديد و علقت عليه
شكرا مره تانيه

 
At 12/3/07 2:46 PM, Blogger mano said...

مادو
انا متفقه معاك جدا
المشكله ان الموضوع اصبح عادى
فى الواقع هو مش عادى
لكن مش عارفه الحل
شكرا للزياره




---------------------------------
hosnysoliman
اولا مجرد زيارة حضرتك مدونتى شرف ليا
ثانيا رأى حضرتك شهاده اعتز بيها

حقيقى الكلمه اللى حضرتك القيتها فى اللقاء كانت جميله
و شدت انتباهى جدا
و انا سعيده باللقاء و خصوصا انه اتاح لى فرصة لقاء حضرتك
انا اللى بشكر حضرتك جدا على حاجات كتير
اولها تواجدك فى اللقاء و ثانيها كلمات حضرتك و الروح الجميله التى اضافتها علينا
و لا يمكن وصف شعورى بكلمات حضرتك ليا بجد
شكرا جدا

 
At 12/3/07 4:10 PM, Blogger The Alien said...

مريم
أنا قلت رأيي ف البوست قبل كده
أنا عايز أقول إني زعلان عشان مقدرتش أقعد وأتكلم معاكي ف اللقاء
وأتمني يكون فيه فرصة قريبة ونتعرف علي بعض أكتر
تحياتي

 
At 12/3/07 8:17 PM, Blogger ياسمين said...

الحياة بقت صعبة فى كل شىء

انتى نورتى اللقاء بجد

تحية من قلب مجروح

 
At 12/3/07 8:29 PM, Blogger mano said...

The Alien
انا كنت اتمنى اتعرف
عليك يا بشوى
فى الحقيقه انا اكتشفت وجود ناس كتير احب اشوفهم فى الآخر
لكن معلش ان شاء الله مره تانيه
اشكرك جدا بجد



-------------------------------
ياسمين
الحياه بقت صعبه فعلا
انتى اللى كنتى منوره اللقاء
انتى اللى تعبتى فيه و اجتهدتى
و السلبيات بسيطه صدقينى مقارنه بالأيجابيات
يكفى انك اول من فكر فى اجتماع بلوجرز بالشكل الثقافى ده
كل ده و تكونى متضايقه
لأ يا ياسمين انتى لازم تكونى سعيده باللى حققتيه و كل مره هيكون احسن من اللى قبلها و كل مره هنتفادى اخطاء المره اللى فاتت
اوعى تزعلى يا ياسمين
نورتينى

 
At 12/3/07 10:49 PM, Blogger ody911 said...

مريم


إزيك

سلميلى على الأمن والأمان كمان


وعادى بقة
أودى

 
At 12/3/07 11:34 PM, Blogger 35L said...

أدعوكم جميعا للمشاركة فى البلوج بتاعى...موضوع مهم بدأت فيه....و أحتاجكم معى

 
At 13/3/07 11:43 PM, Blogger mano said...

ody911
اهلا يا اودى
الأمن و الأمان بيسلم عليك كتير
واضح فعلا ان الموضوع اصبح عادى جدا
منور



---------------------------------
35L
شكرا لدعوتى للأطلاع على موضوعك
و قد اطلعت بالفعل
شكرا للمرور

 

Post a Comment

Links to this post:

Create a Link

<< Home