Saturday, February 24, 2007

ليس تضامن مع كريم عامر و لكن دفاعا عن انفسنا



لم أكن من المتابعين لقضية المدون كريم عامر. و لم اعرف عنها الكثير و لم اهتم بالتفاصيل
في البداية تصفحت مدونة كريم و لم تستوقفني أو اشعر بأهمية ما بها
كل ما كنت اعرفه انه كان يحاكم بتهمة ازدراء الأديان
و منذ عدة أيام عرفت إن الحكم صدر على كريم بالحبس أربع سنوات
هكذا عرفت بدون تفاصيل
و لكنى مؤخرا عرفت تفاصيل الحكم. ثلاث سنوات بتهمة ازدراء الأديان . لحد هنا مفيش مشكله
و عام بتهمة إهانة الرئيس. فلنتوقف هنا قليلا. كثير منا ضد إهانة كريم للأديان التي لا أراها حرية تعبير
و لكن ما هي إهانة الرئيس؟؟!!
أراها عبارة مطاطة لا حدود لها. و هي بالمناسبة نفس التهمه التي يحاكم بموجبها الكاتب الصحفي إبراهيم عيسى

إذن التهمه تم تنفيذ حكم بشأنها بالفعل و هو الصادر ضد كريم
و البقية تأتى. قد يكون كريم أول من حكم عليه بهذه التهمه لأنهم يعلمون انه لا يحصد الدعم الشعبي و الأغلبية ضده
و بالتالي لن يتضامن الكثيرين معه
فتم تمرير التهمه و الحكم عليه بموجبها. و بذلك أصبحت تهمه موجودة بالفعل
و كلنا الآن معرضين لها في اى لحظه
و قد يكون اى شيء نكتبه في نظرهم إهانة للرئيس أو اى شخص. فلا حدود واضحة لهذه التهم
فلنعلن إننا ضد هذه التهمه بكل المقاييس. فلا احد معصوم من الخطأ. و نقد الرئيس و سياساته ليس أهانه
بل هو ابسط قواعد الديمقراطية
هكذا أصبحت التهم إهانة الرئيس، إهانة القضاة، و إهانة المؤسسة العسكرية
فلنعلن إننا ضد هذه التهم حتى لو كان المتهم هو كريم عامر

50 Comments:

At 24/2/07 2:44 AM, Blogger إبـراهيم ... معـايــا said...

فعلاً يا مريم استوقفني جدًا هذا الحكم ، فمع علمنا بأنه يستحق ، لكن ـ لامؤاخذة يعني ـ من إمتى الدولة مهتمة قوووي بإزدراء الأديان كده ؟؟؟؟ ، ولا هيا عاوزة تحشر تهمة إهانة الزفت اتلرئيس !!!!



فعلاً حسبنـا الله ونعم الوكيل


سؤال تاني بينط لدماغي ، هوا لو كان كريم عامر مش مدون ، كان حد هيعرف الحقيقة ؟؟؟؟

 
At 24/2/07 3:26 AM, Anonymous Alaa said...

كويس أنك خدتي بالك من خطورة موضوع اهانة الرئيس

سؤال على الماشي، الناس اللي شايفة عبد الكريم يستحق الحبس رؤيتهم لوظيفة العقاب بالحبس ايه بالظبط؟

في تصوري وظيفة العقاب بالحبس هو حاجة من ثلاثة، حماية المجتمع من الجاني (بمعنى حرمانه من فرصة اعادة ارتكاب الجريمة)، ردع الجاني و أي حد ثاني يفكر يكرر نفس الجريمة و أخيرا تهذيب و تقويم الجاني بحيث يختار أنه يغير من نفسه.

هل يا ترى في نظركم حبس عبد الكريم يحقق أي من ده؟ ولا أنتم شايفين للحبس وظيفة أخرى؟

 
At 24/2/07 4:04 AM, Blogger AbdElRaHmaN said...

مممم
انا معاكي تماما ان موضوع اهانة الرئيس اهم كتير من اي حاجه تانية
مش مهم عشان الرئيس
لا طبعا
مهم عشان مغزاه
احنا كده كلنا ممكن دلوقتي مدوناتنا تتقفل واجهزتنا تصادر
وكلنا نعتقل بتهمة اهانة الرئيس
صعب يظبطوا علينا ازدراء الاديان دي
بس سهل اوي انهم يقولوا على معظم المدونين انهم بيهينوا الرئيس
انا ضد الكلام اللي قاله كريم
ومع حقه في التعبير باسلوب ارقى
وضد حبسه تماما
فقط
تحياتي

 
At 24/2/07 4:52 AM, Anonymous حسن محمود said...

الحمد لله يابنتى انك عاقلة
شوفى
متفق معاكى تماما ان لحد 3 سنين بتهمة ازدراء الاديان مافيش مشكلة
هو ده الكلام
عبيط مش عبيط
بيفهم مش بيفهم المفروض مايقربش للاديان وكويس انك مش بتناقشى النقطه دى
عالشان الدين المفروض يفضل بعيد عن الازدراء والتهزيق والاهانة
وعداكى العيب وقزح لبعيد
والناس اللى بتقول هو كده هايكره الاسلام ولا عمره هايفكر فيه
ومين قال ان الاسلام مستنى واحد زيه
بناقص الواحد ده

نيجى بقى لموضوع الاهانة للرئيس اللى هى عامله زى العيب فى الذات الملكية ايام الملك
هنا بقى ممكن أختلف معاكى شويه؟

تفتكرى لما أقول حسنى مبارك ديكتاتور وفرعون أنا كده استفدت أى حاجه؟
ليه اصلا لغه الحوار تبقى متدنية قوى كده؟

طيب شوفى
انا بكره السيد الرئيس حسنى مبارك جدا
بس هو برضه لسه رئيس الجمهورية والمفروض يبقى ليه مقامه برضه
ماجيش اكلمه زى واحد صاحبى

والموضوع بتاعك فكرنى بايام السادات لما عمل حوار مع الطلبه فالطلبه سلخوه اسئلة وتريقه
وفى واحد نرفزه فقله
أنت بتكلم رئيس الجمهورية ياولد

رأيى الشخصى حتى لو بكره الرئيس لازم المقامات تكون محفوظه
ولما أشتمه مش هاستفيد حاجه
على العكس دينيا هو بياخد حسنات على قفايا
طيب ليه اسمح بكده؟
ما أقول على طول اللى مش عاجبنى فى الريس وخلاص من غير شتيمه ومن غير سفاله
وعارفه
ممكن الريس لما يشوف ان اللى بينتقده بيحترمه يمكن يهز ساكن ويخليه يتناقش فى الموضوع
اما لما أجى اقل ادبى واشتم ماهو ممكن يروح مستخدم القوة اللى عنده ويودينى فى السجن
أستفدت انا ايه بقى ؟
اذا انا حقيقى عايز تغيير أقول مطالبى بالزوق والادب .
ينفع؟

طولت عليكى معلش
وللأسف ماقدرش أعلن انى ضد هذه التهم لأنها حقيقية

 
At 24/2/07 5:01 AM, Anonymous حسن محمود said...

ولو تسمحيلى بس أرد على علاء

ايوا يافندم
الحبس هايردعه انه يفكر انه يعمل عملته دى تانى

طبعا هاتقولى لا مش هايبطل و هايعند أكتر
براحته
هاياخد حكم مضاعف المره الجايه عالشان هايبقى عنده سابقه

السؤال الحقيقى بقى, فيه ناس ناشره كلام أسوء وأقبح منه
ليه الحكومه ماقبضتش عليهم؟؟؟؟
هو ده السؤال

 
At 24/2/07 2:02 PM, Blogger nar said...

موضوع إهانة الرئيس لا علاقه له بالقضية أنا ما كخالص طب لنا بنشتم الرئيس هيه ولا حتى خادو إزدراء الأديان وسيلة لعقابه ..... يعني هوا ماعدش الا كريم الذي يكرهه الجميع ليخافوا منه وهوا أصلا ماحدش طايق يشوف خلقته ..في ستين ألف داهية يا كريم
عامل فيها بهلوان وأراجوز ومادافعش عن حق المعتقلين الآخرين الإسلاميين مثل أبو إسلام عبدالله وفرح فيه .. نيجي احنا ندافع عنه عشان حاجة هوا مش مؤمن يبها وهيه حرية التعبير ...وبعدين يا علاء العقوبة ضرورة ....واحد مدمن سرقة نسيبه عشان مفيش أمل في إصلاحه دا اسمه عبط بالتقيل ..وهوا احنا لسه هنكون معرضين ما عندك إشغال الطريق العام وتجمهر أ:ثر من خمسة يعني العملية كلها في المهلبة يا ست مريم

 
At 24/2/07 2:06 PM, Blogger Dr. Tantawy said...

واضح ان انا و انتي كتبنا التدوينه في نفس الوقت :) بس فرصه الواحد يلاقي حد بيتكلم معاه في نفس الموضوع لأني مش شايف اهتام اوي بالموضوع مع انه مصيبه فعلا

طبعا بالنسبه لتدوينتك انا متفق معاكي تماما و يمكن انتي كمان استفضتي فيها اكتر من ما انا كتبت

لكن ليه رد على علاء

اولا .. تصوره لمعنى الحبس ده حاجه شخصيه وليست نظريه قائمه علشان كده لو يسمحلي ( اكيد هيسمح طبعا هههه ) اني مش هتكلم عنها

لكن اللي يهمني حاجه وحده .. احنا دوله اسلاميه .. شاء هو ام ابى .. عشان كده ازدراء الدين هيفضل تهمه يعاقب عليها القانون دنيا و دين .. و طز في اي دعوة حريه تخلي الدين لبانه في بؤ كل واحد يتكلم عنه
اما ما نتفق فيه جميعا .. هو ان اهانه اي شخض في الدنيا ( طالما انها باسلوب منطقي ) و ليست مجرد شتيمه و السلام هي تهمه لا يعاقب عليها القانون
لأن رئيس الجمهورية مش نبي مرسل ..لو حد غلط فيه يروح يرفع قضيه سب و قذف و ياخد حقه بالقانون زيه زي اي مواطن تاني .. انما ان يبقى في قانون يقول اللي يتكلم على رءئيس الجمهوريه يتحبس يبقى احنا بقينا نسوان في البلد دي و نلبس طرح احسن

انا اسف للإظاله لكن كلام علاء استفزني لان بيتكم عن الحريه و كأنها لا نهائيه و كل واحد يخبط في اللي هوه عايزه و يقول فالاخر دي حريه رأي و انا حر

تحيااااتي مريوووم

 
At 24/2/07 2:50 PM, Blogger Sharm said...

مريم

انتى قريتي الكلام اللى كاتبه للرئيس قبل ما تكتبي البوست ؟؟

معارضة الرئيس شئ و اهانته شئ تانى


هو كان كاتب خطاب للرئيس على موقع الحوار المتمدن

و الكلام كان اهانة اكثر منه نقد

ما اغلب المدونيين من المعارضة لكن حد جه جنبهم عشان التهمة دي ؟؟

الرئيس ده رمز البلد يا مريم و مش المفروض اننا نهينه سواء كنت معه او ضده

 
At 24/2/07 5:34 PM, Anonymous واحد من الناس said...

المشكله في اقتران تهمة سب الرئيس بتهمة سب الرسول
واخده بالك
والله هم يبكي و هم يضحك

 
At 24/2/07 6:49 PM, Blogger شادي فايد said...

اممممممممممم

مش عارف اقولك ايه

بس طبعا موافق الرأي

شكلهم كده حيحكموا على ابراهيم عيسى خلاص

 
At 24/2/07 7:49 PM, Blogger mano said...

إبـراهيم ... معـايــا
تمام كده من امتى بيهتموا
بأزدراء الأديان
هو ده السؤال
واضح طبعا ان اهانة الرئيس هى السبب الأساسى زى ما انت شايف
كلامك سليم
شكرا لزيارتك



---------------------------------
alaa
اولا اهلا بيك
سعيده جدا بزيارتك
بما ان اختلاف الرأى لا يفسد للود قضيه
اظن اننا اختلفنا فى نقطه و اتفقنا فى نقطه
بالنسبه لسؤالك احب اوضح حاجه
لنفترض ان اى شخص مش فاهم حاجه فى الدين و عنده سؤال و ده وارد و مش غلط. يسأل اهل العلم و لو لم يقتنع هو حر
خلاص فليترك الدين و الحساب بينه وبين الله
من شاء فليؤمن ومن شاء فليكفر
يعنى كريم حر يترك الدين و ده لم يحاسبه عليه احد
لكن ابسط قواعد الحريه ان حريتى تتوقف عند حدود حرية غيرى
و من غير الائق ان اهين الدين
و انا اعنى كل الأديان
لأن الدين اعلى من الأهانه
انا اساسا لا اعتقد ان الدوله تهتم بالدين
و اعتقد ان كريم حوكم فعليا بسبب آرائه السياسيه
و الخطوره تكمن فى تهمة اهانة الرئيس التى تم تمريرها عن طريق كريم
شكرا لزيارتك مره تانيه

 
At 24/2/07 7:56 PM, Blogger mano said...

abdelrahman
هى دى المشكله
اهانة الرئيس عباره مطاطه
و ملهاش قواعد او حدود
يعنى كلنا من الطبيعى نقلق
اشكر زيارتك جدا



----------------------------------
حسن محمود
مناقشة الدين امر طبيعى
لكن اهانته مرفوضه بكل الأحوال
انا شايفه طبعا ان الأسلام مش هيقل و لا ينتقص منه اذا تركه شخص مثل كريم
بالنسبه لموضوع اهانة الرئيس
ده مصطلح مش محدد
يعنى ابراهيم عيسى مثلا نشر خبر ان واحد رفع قضيه على الرئيس
بيتحاكم دلوقتى بنفس التهمه بسبب الموضوع ده
و بعدين فى مواطن امريكى قال ان بوش غبى و حمار
و محدش عمل له حاجه
انا مش بقول ان ده صح
بس الفرق واضح
شكرا لزيارتك

 
At 24/2/07 8:00 PM, Blogger mano said...

حسن محمود تانى
البلوج بلوجك
و البيت بيتك
رد زى ما انت عايز
فعلا فى ناس عملوا حاجات اسوأ بس محدش كلمهم يا ترى ليه
اشكر متابعتك وآرائك
و اشكر زياراتك للمدونات
و بجد احييك على فكرك الواعى
و اتمنى اسمع رأيك على طول



--------------------------------
nar
المشكله ان دلوقتى لأنهم عارفين ان كريم شخص غير محبوب
مرروا القضيه عن طريقه
و ده تهتديد غير مباشر لينا كلنا
شكرا لزيارتك

 
At 24/2/07 8:05 PM, Blogger mano said...

Dr. Tantawy
طبعا انا اتفق معاك
و زى ما قلت لك
كريم يتحاكم بتهمة ازدراء الأديان آه
لكن بتهمة اهانة الرئيس لألألأ
لأن الباب ده لو اتفتح
هيبقى تهديد لينا كلنا
يعنى كل ما نتقدم خطوه نرجع خطوتين للوراء
شكرا لزيارتك




---------------------------------
Sharm
مش هكدب عليك انا لم اقرأ ما كتبه كريم عن الرئيس
لكن انا ضد التهمه دى مهما كان
يعنى ابراهيم عيسى مثلا نشر خبر ان واحد رفع قضيه على الرئيس
بيتحاكم دلوقتى بنفس التهمه بسبب الموضوع ده
و بعدين فى مواطن امريكى قال ان بوش غبى و حمار
و محدش عمل له حاجه
مش معنى كده ان ده صح
بس زى ما انت شايف
الباب ده لو اتفتح
هنبقى كلنا تحت التهديد
شكرا لزيارتك

 
At 24/2/07 8:07 PM, Blogger mano said...

واحد من الناس
فعلا يعنى كأن التهمتين
فى نفس الأهميه
هنقول ايه
شكرا لزيارتك


---------------------------------
شادي فايد
انا مش عارفه اقول ايه
اول ما عرفت الحكم على كريم
فكرت فى موضوع ابراهيم عيسى
ربنا يستر
نورت

 
At 24/2/07 10:05 PM, Blogger شادي فايد said...

مريم

يا ريت لما تفضي كده
تقري بوست قديم عندي

لم يلقى قبول من القراء ولا يوجد عليه غير كومنت واحد

ليس نقداًُ..ولكنه الأهلي المصري

 
At 25/2/07 1:17 AM, Blogger مـحـمـد مـفـيـد said...

لا تضامنا ولا يحزنون
اعتقد ان كريم ده عبره لمن لا يعتبر
لا اتحدث عن اهانه الرئيس بل اتحدث عن ما هو اعظم من ذلك هي اهانه الدين الاسلامي وسب الرسول
يجوز ان انتقد واحتلف في الرأي معكي ولكن لا تصل الي درجه الاساءه والتجريح والسب العلني
فهناك اصول لابد من الايمان بها ولا نقترب منها
انما الفروع فيجوز ان نتحدث عنها
اي تضامن تريدي النتي يا مريم ان نناضل من اجله مع ذلك السفيه
اعتقد انه يسئ كل الاساءه لكل من يتعامل معه ويسئ الي التدوين لانها ليس هو ذلك الوجه القبيح الذي ظهر به ذلك المدعو وتحدث العالم كله عنه

فليذهب كريم الي الجحيم ولتبقي العقائد والاصول راسخه
ولا نجعل العاطفه تسيطر علينا

 
At 25/2/07 1:24 AM, Blogger يا مراكبي said...

للأسف أنا ما قريتش أي حاجة لكريم عامر وبالتالي مش قادر أقول رأيي في الحكم عليه

لكن المبدأ العام إنه لو كان أهان الرئيس أو أي شخص تاني غير الرئيس فده بيحطه تحت المساءلة القانونية والأدبية لأنه أسلوب غير لائق

لكن لو كان معارض للرئيس فهنا بقى الكلام .. لأن دي بتكون رسالة لكل المعارضين بكل درجاتهم بأن الحرية توفاها الله

وشكرا

 
At 25/2/07 2:16 AM, Blogger mano said...

شادي فايد

شكرا يا شادى انك طلبت
انى اقرأالبوست
انا قريته و فعلا عجبنى



---------------------------------
محمد مفيد
انا لم اطلب التضامن مع كريم
و انا ضد ازدراء الأديان
و ضد اهانة المقدسات
و لا اوافق ابدا على ما كتبه كريم
انا بتكلم عن نقطه تانيه
و هى اهانة الرئيس
انا خايفه ان كريم يكون مجرد الأفتتاح
بتاع التهمه دى
و البقيه تأتى
مره اخرى انا لم اطلب التضامن مع كريم
و لكن طلبت اننا نرفض تهمة اهانة الرئيس
نورت



-----------------------------------
يا مراكبى
انت لم تخسر انك لم تقرأ لكريم
انا كل اللى يهمنى هنا
ان عبارة اهانة الرئيس
ليست محدده
يعنى زى ما قلت ابراهيم عيسى بيتحاكم بنفس التهمه لأنه نشر خبر عن مواطن بيقاضى الرئيس
طيب ايه الأهانه فى كده
يعنى دلوقتى اى واحد يكتب كلمه بحسن نيه
ممكن حد يشوفها اهانه للرئيس
و هنا تبقى مشكله و مش هنخلص
شكرا لزيارتك

 
At 25/2/07 7:16 PM, Blogger sarah la tulipe rose said...

فعلا ايع علاقة لزدراء الاديان باهانة الرئيس
و لا هي عشان يكسبوا الدعم الشعبي دة ياجماعة بيشتم في الاديا..يقوموا بالمرة معها اهانة الرئيس و بعديم تبقي تهمة رسمية
و اخرتها ايه بقي

 
At 25/2/07 8:18 PM, Blogger micheal mohsen said...

بالرغم من أني ضد موضوع سب الاديان في المدونات الا أني ضد اللي حصل مع كريم تماما لان دة معناة ببساطة أن أي واحد حيقعد يفكر مييت مرة قبل ما ينشر أي كلمة أو أي فكرة في دماغة..يعني مزيد من القيود علي الفكر و المسألة مش ناقصة...أما بخصوص كريم فالولد دة كدة بصراحة مستقبلة ضاع و ربنا يستر علية بعد ما يخلص سجن
تحياتي لكي

 
At 25/2/07 10:01 PM, Blogger IRC President said...

أنا مش فاهم يعني

في دلوقتي حاجة إسمها خطاب الكراهية والعنصرية

وأنا شايف إن الإتنين دول توافروا في تمنة إزدراء الأديان

وده المفروض إنه مع حرية التعبير

لأن الحرية تنتهي عند حرية الآخرين في التعبير

حتي تعبير
Tolerance
معناه إنني أستحمل إزعاجك


إنما حوار رئيس وزفت وقطران
فربنا يستر على المدونات والنشر الإلكتروني بصفة عامة

 
At 25/2/07 11:13 PM, Blogger أحمد المصري said...

عندك حق 00احنا ضدها دفاعا عن انفسنا
كويس غنك خدت بالك من الحتة دي 00
قال رئيس قال00وبعدين حتى تهمة الحبس 00
كان لازم الأزهر يبقى أكثر رقيا في حل المشكلة عن الإتهام والحبس00مش كده ولا إيه؟
مع تحياتي00
والسلام عليكم0

 
At 25/2/07 11:51 PM, Blogger O2A said...

فى البداية انا عايز اعلن : غضبى من كل واحد مابيحترمش الاديان سواء كريم سواء أو نكنيف أو غيرهم كتير. بعدين حكاية إزدراء الاديان دى ماطالتش ليه نكيف ده اللى بيقولى هو ده فعلاً يستحق العقاب الشديد..!!! . وانا عندى اعتقاد ان كريم هو انسان مقهور يستحق الانصات له:يعنى كان بعض الاخوة المشايخ فى الازهر يقعدوا معاه ويفهموا منه ايه الحكاية ويحاولوا يعقلوه .إذا كان ربنا قال لموسى و هارون ما معناه إذهبا إلى فرعون وقولوا قولاً لينا. طب هل كريم فرعون وقال انا ربكم الاعلى ؟؟ الإجابة: لاء. طب هل نحن مثل سيدنا موسى الإجابة: :بالطبع لاء. يبقى لازم نشوف طريقة تانية للتعامل بدل مايخش السجن ويخرج إرهابى او مجرم وهو لسه شاب صغير . وبعدين لو الحكومة هتعاقب الناس على إزدراء الأديان يبقى نص البلد هتخش السجن بسبب الشتيمة الدارجة فى مصر"سب الدين" اللى فى كل حتة دلوقتى

عندى اعتقاد جازم ان الحكاية كلها كارت إرهاب لكل من تسول له نفسه تخطى الخطوط الحمراء او من الممكن ان تكون محاولة لجس النبض من اجل الحركة القادمة وهى إسكات اى مدون او كنوع من التعمية لكى يبتعد المدونين عن خط السير الحالى (الإصلاح و كشف الفساد والتعذيب ) و ينشغلوا بقضية كريم


نص المقالةاللى كريم تحاكم بسببها منشور فى جريدة صوت الامة عدد 26/2/2007 صفحة 14. وكالعادة الجورنال كشف كوراث تانية كتير تخلى شعر الطفل يشيب...ربنا يستر... بس هل نحن نستحق الستر..؟؟؟!!!!

 
At 26/2/07 12:00 AM, Blogger mano said...

sarah la tulipe rose
شوفى يا ساره مش هقولك
اكتر من انك قلتى اللى انا عايزه
اقوله
كده تهمة اهانة الرئيس بقت رسميه فعلا
ربنا يستر
منورانى دايما


---------------------------------
micheal mohsen
هو ده اللى انا خايفه
منه يا مايكل
دلوقتى اى حد بقى تحت التهديد
و بعد الحكم على كريم
اى حد هيفكر عشر مرات قبل نشر كل كلمه
مش عارفه اقول ايه
شكرا للمرور
معنى كده انها رساله موجهه

 
At 26/2/07 12:06 AM, Blogger mano said...

IRC President
لو كريم كان اتحاكم على ازدراء الأديان
بس مكنتش هفكر فى الموضوع
لكن تمرير تهمة اهانة الرئيس بالشكل ده
معناه ان الموضوع زى ما يكون رساله
شكرا لزيارتك


----------------------------------
أحمد المصري
انا فعلا ملاحظه ان علماء
الأزهر لم يحاولوا يتناقشوا مع كريم
و يمكن كان فى تعسف معاه شويه
المشكله دلوقتى فى موضوع اهانة الرئيس
ربنا يستر
شكرا لمرورك




--------------------------------
O2A
انا فعلا ملاحظه ان علماء الأزهر
لم يحاولوا مناقشة كريم
انا متفقه معاك ان ده كارت ارهاب
زى ما تكون رساله موجهه
علشان محدش يتكلم تانى
انا لسه كنت بقرأ صوت الأمه
و قرأت مقالات كريم
و طبعا قريت المواضيع التانيه
و كله بالمستندات
ربنا يستر على حاجات كتير
اشكرك على وجودك الدائم

 
At 26/2/07 1:00 AM, Blogger tota said...

مانو
طبعا مخيف ان الحرية تتحول الى شىء خانق نعاقب عليه
لكن مش قانون مصرى بس
فى الدول الملكية سب الذات الملكية يعاقب عليه بالحبس وحتى وصل الامر ان انكار الهولكوست فى بعض الدول ايضا يعاقب عليه بالحبس
ما زال لدينا متنفس حرية ضئيل لكن موجود
اسمحيلى اخرج عن الفكرة لانى فاهمة فكرة البوست بس كريم تعدى كل الحدود لو على التدوين والكلام فقط فاظن ان اغلب الشعب يسب الذات الحسنية والحكومة فى كل وقت ولم يعاقب احد على ذلك
كريم اغلب الظن له هدف مختلف من ازدراء الاديان يلجأ اليه كل من يريد الهجرة محمى بفكرة الاقلية التى تضطهد
وبعدها يطلب اللجوء الى دولة تمنحه تأشيرة دخول من المستحيل الحصول عليها فى الظروف العادية
لكن الموقف خرج عن يده فتداخل اكثر من موقف وانتهى بالحبس بسببين كما ذكرتى
والله اعلم مجرد تخمين
تحياتى

 
At 27/2/07 1:58 AM, Blogger Sharm said...

شوفي يا مريم

الواحد لازم يحترم دستور و قوانين البلد اللى هو فيها

هما عندهم في امريكا مفيش تهمة اسمها اهانة الرئيس

لكن احنا عندنا التهمة دي

فمحدش يقع فيها و نحاول نبرأه

الاجدى

اننا نحاول نلغي العقوبة من نص القانون و بعد كده اللى مزنوق في كلمة يقولها

ولا ايه ؟

 
At 27/2/07 12:07 PM, Blogger Human said...

هو اي واحد مزنوقين وعايزين يدخلوه السجن ........تهمتين لا ثالث لهم اهانة الرئيس
ومحاولة انقلاب على الحكم
............
بس عبد الكريم ده وقع في شر اعماله

 
At 27/2/07 7:32 PM, Blogger ody911 said...

حسبنا الله ونعم الوكيل

 
At 28/2/07 2:02 PM, Blogger bluesky said...

مانو
عندك كل الحق في قلقك مما حدث
المشكلة ان الحكومة و الاعلام لعبوها صح دوروا على واحد الناس كرهاه اصلا عشان يكون البداية عشان الناس ما تحسش باللي هما ناويين يعملوه
حاجة تانية مانو ..انا كمان ضد قلة الادب لان اخلاقنا و ديننا قبل كل حاجة تحث على حرية النقد بلا تجريح او ايذاء لقد حرم علينا اذاء الحيوان فما بالك بالانسان بغض النظر عما نكنه من مشاعر لهذا الانسان
بس المشكلة هنا مين الي يحدد قانونا ان الكاتب دة خرج من النقد الى الاذاء؟؟
دة السؤال الي جه في دماغي

 
At 28/2/07 5:51 PM, Blogger mano said...

tota
انا سعيده جدا بوجودك يا توتا
و بجد وجودك له طعم خاص
اما بالنسبه لرؤيتك ان كريم قد يكون فعل ذلك من اجل الهجره
فكل شىء جايز
انا لا استبعد شيئا
اتفق معك ان كريم تعدى حدود كثيره
منوره يا توتا




---------------------------------
Sharm
التهمه دى جديده
حسب علمى ان كريم عامر اول شخص تطبق عليه التهمه دى
فى العهد الجمهورى
هى كانت موجوده ايام الملك
لكن مفيش حاجه اسمها اهانة الرئيس
يعنى دى تهمه جديده
و احنا لازم نرفضها
و بعدين لو لم نرفضها اليوم
قد نعرض لها غدا
شكرا للمرور

 
At 28/2/07 6:00 PM, Blogger mano said...

Human
كلامك سليم
و فعلا كريم وقع فى شر اعماله
و زى ما تقول
انقلب السحر على الساحر
اشكرك على وجودك



--------------------------------
ody911
هى دى انسب حاجه نقولها
شكرا للمرور
منور دايما



----------------------------------
bluesky
العزيزه
blue sky
اتفق معك جدا
ازدراء الأديان كلنا ضده
لكن حريه النقد والتعبير كلنا معها
سؤالك حلو جدا
زى ما قلت اهانة الرئيس شىء مطاط ليس له حدود
منوره

 
At 28/2/07 10:29 PM, Blogger واحـــد مـــــن الـنـــاس said...

مفيش جدال في استحقاقه للحبس 3 سنوات بتهمة ازدراء الاديان

مع ان رايي الشخصي ان ده مش الاسلوب الامثل للحوار مع امثاله

انما تهمة اهانة الرئيس دي

فالشعب المصري كلو يبقى مجرم ويستحق الحبس سنة

وانا متفق معاكي تماما في كلامك

 
At 1/3/07 12:53 AM, Blogger albida said...

بصى بقى يا مريوم انا الموضوع ده انا أساسا مش بلعاه من طقطق لسلاموعليكم!!! انا حاسة أن كل البروباجاندا اللى اتعملت حوالين كريم دى هى السبب فى شهرته, مش ارائه الفذة يعنى

أساسا كل الكلام اللى كان بيقولوه كلام فارغ وغير مبنى على منطق أو أى تبريرات حتى... لكن هو علشان حشر نفسه فى السياسة وشتم فى جناب الكوماندا المهم حصل اللى حصل

اللى انا مضايقة بسببه فعلا أن الناس ابتدت تقرا الحاجات اللى كان بينشرها بعد ما الظيطة والظمبليطة دى حصلت... يعنى كده احنا بنشهره أكتر واكتر من غير مانحس

وهو أساسا انسان مايستهلش ولا يستحق الاهتمام


manal

 
At 1/3/07 1:24 PM, Blogger smraa alnil said...

تصدقي انا معاكي اصل لو الموضوع كدة يبقي انا كمان هعتقل بنفس التهمة وانتي وغيرنا من اللي قالوا رايهم بصراحة

بس عامة التلات سنين دول ماهي الا واجهه عشان عشان يحطوها لانه سب الريس بس
يعني لو مش كان شتم الرئيس مش كان في حد هيجي جنبه بحجة ان هو حر في اعتناق ما يفكر به
حسبي الله ونعم الوكيل

 
At 2/3/07 2:34 PM, Blogger mano said...

واحـــد مـــــن الـنـــاس
يمكن فعلا يكون ده
مش الأسلوب الأمثل للتعامل معاه
يعنى الأزهر على حد علمى
لم يحاول ان يناقشه او يتحاور معه
و ده كان لازم يحصل
شكرا لمروروك يا على



---------------------------------

albida
اتفق معاكى يا منال
انا اساسا شعرت بالأشمئزاز
من كتابات كريم
و لم اتعاطف معه مطلقا
لكن انا خفت ان تهمة اهانة الرئيس
تفتح علينا باب مش هيتقفل
و التهمه تم تمريرها عن طريق كريم
لأنه لا يجمع اى تعاطف حوله
منوره يا منوله
و حمد لله على السلامه



----------------------------------
smraa alnil
كلامك سليم يا انوج
من امتى يعنى بيهتموا بالدين
فى ناس اكتر من كريم
و محدش عمل لهم حاجه
ربنا يستر
منوره يا انوج

 
At 2/3/07 11:05 PM, Blogger Sharm said...

لا يا مريم ازاي مش موجودة .. نصها اهو



م 179 ع:

يعاقب بالحبس مدة لا تقل عن ستة اشهر ولا تجاوز خمس سنوات او بغرامة لا تقل عن خمسمائة جنيها ولا تجاوز الف جنيه كل من اهان رئيس الجمهورية بواسطة احدى الطرق المتقدم ذكرها.

 
At 3/3/07 12:12 AM, Blogger mano said...

Sharm
اعتذر عن خطأى انى قلت انها مش موجوده
و اشكرك على تصحيح ذلك الخطأ
انا كنت اقصد
ان الماده دى لم يحاكم بها احد فعليا فى العهد الجمهورى
لدرجة انى لم اكن اعرف انها موجوده
اذكر ان ابراهيم عيسى علق على الحكم الصادر ضده
انه اول شخص يحاكم بهذه التهمه فى العهد الجمهورى
و انها منذ العهد الملكى
و كان اسمها اهانة الذات الملكيه
اشكرك على التوضيح
و اشكرك على المتابعه

 
At 4/3/07 8:33 PM, Blogger 35L said...

السلام عليكم.....لقد افتتحت مدونة جديدة.....رجاء الاطلاع عليها و ترك تعليقات حتى أعرف هل أستمر أم لا؟.....أنا لست مدون جديد....و لكنى أغير وجهتى فى الكتابة.....شكرا

 
At 4/3/07 8:34 PM, Blogger Sampateek said...

طيب ميجراش حاجة
ممكن نقول زيد او عبيد هو احنا حنغلب
:))
امضاء

اللي ما يتسمى

 
At 4/3/07 10:18 PM, Blogger 35L said...

thank you mariam for visiting my blog......wish to visit it periodically

 
At 5/3/07 12:02 PM, Blogger كلمه said...

eih y3ni lma yeshtemo wla yetef fe wesho 7ta ....
mesh da ensan brdo ... y3ni mesh mel mokadasat
y3ni mesh rabna wla elnaby
2e7traamo shee2 mel zoo2 (3shan ragel kebeer fe sen gdy allah yer7mo)
mfeesh kanoon begberak te7terem elkebeer ... da she2 mel zoo2
mesh mel kanoon ya naaas :D

 
At 5/3/07 2:26 PM, Blogger ياسمين said...

هو دة القانون
هنعمل ايه .. لازم القوانين تتغير الول وبعدين نتكلم

ما فيش حد فى العالم بيعترض على حكم القضاء واحنا لازم نكون متحضرين

بص أنا أصلا كنت جاية لك عشان تشارك معانا فى اللقاء الشهرى للمدونين

حكون مبسوطة لو جيت معانا الجمعه القادمه
لمزيد من التفاصيل
تعالى مدونتى
سلام

 
At 5/3/07 3:09 PM, Blogger mano said...

35L
اشكرك على دعوتى
لزيارة مدونتك
و سأدازم على الزياره



-----------------------------------
Sampateek
طبعا احنا مش هنغلب
بس يستنوا علينا
منوره دايما

 
At 5/3/07 3:12 PM, Blogger mano said...

35L
don't thank me
and i will visit ur blog every now and then



-----------------------------------
كلمه
اتفق معك تماما
احترام الكبير واجب
لكن كل شخص يفعل ما ينبع منه
علشان كده مينفغش يبقى في قانون زى ده
خصوصا ان هناك من يتعمد الخاط بين النقد والأهانه
شكرا للمرور

 
At 5/3/07 3:14 PM, Blogger mano said...

ياسمين
اشكرك على الدعوه دى يا ياسمين
و طبعا يشرفنى اكون معاكم
ان شاء الله هحاول آجى
و شكرا مره تانيه على الدعوه
نورتينى

 
At 29/7/07 6:45 PM, Blogger kol-eldonia said...

كريم الشرقاوى حسبى الله و نعم الوكيل من يسمى الله جل جلالة بالكائن الوهمى لا يستحق الحياة اصلا و ادعو ذلك الشخص الى ان ينظر الى من خلقة و لا اظن ان اجد من يخالفنى هذا الراى و ثانى شىء لا يجوز لاى شخص مهما ان كان ان يسب رئيس الجمهورية انتقد و هذا حقق و لكن تسب فهذا ما ياخذ عليك حتى و لو لم يكن السب لرئيس الجمهورية و كان لاى شخص اخر فيعد جريمة سب يعاقب عليها القانون بالحبس و التعويض و بالفعل حسبى الله و نعم الوكيل و ادعو كل شخص يفكر بنفس تقكير ذلك الشخص ان يقكر فى يوم يعود فية الى ربه

 
At 1/8/07 12:11 AM, Blogger mariam said...

kol-eldonia
اولا اهلا بيك
على فكره هو اسمه كريم عامر مش الشرقاوى

طبعا انا لا اؤيد كريم فى افعاله و لا اتقبل طبعا كلامه عن الله بتلك الطريقه ابدا
و انا هنا ادين الحكم باهانة رئيس الجمهوريه
يمكن فعلا فى تطاول زياده
لكن المشكله ان دى عبارة مطاطه لو استخدمت مره فى موضعها ستستخدم مئات المرات فى غير موضعها
يعنى لا يوجد تحديد يعنى ايه اهانة رئيس الجمهوريه

شكرا ليك و شرفتنى

 
At 24/11/10 8:43 AM, Anonymous Anonymous said...

دين الخالق واحـــــــــــــد

شريعته تنزلت بالتدريج رأفة للبشر

ولم تكن تلك الشريعة لتنزل لدين الله الواحد

لتسمى على اسم يهودا باليهودية
ولا على اسم بوذا لتسمى بالبوذية
ولا على اسم مسيح ومصلوب لتسمى بالمسيحية
ولا البهائية ولا الاحمدية ولا السيخية والهندوسية

فكل تلك ما هي الا خزعبلات بشر

ودين الله ان تسلم وجهك وجميع جوارحك لله خالقك


فكيف بحقوق انسان تزدري الخالق

وبشر يمعنون وبجهل في ازدرائه

منهم من يتخيله خاروف ومنهم من يتخيله بقرة ومنهم من يتخيله مصلوب ومنهم من يتخيله حتى شيطان

فهل هناك حق لانسان يفوق حق الخالق

فلتخرص مثل تلك الجماعات الجاهلة
فلا حق لانسان ضد حقوق الخالق
يــــــــــــــــا لها حقا حقارة وجهل

 

Post a Comment

Links to this post:

Create a Link

<< Home