القراءه مش للجميع
القراءه للجميع
و ماله
اقرأ لطفلك
يا ريت
الحمله الأعلانيه للمشروع اتكلفت 10 مليون جنيه
نعم................. ليه ان شاء الله
و ماله
اقرأ لطفلك
يا ريت
الحمله الأعلانيه للمشروع اتكلفت 10 مليون جنيه
نعم................. ليه ان شاء الله
واحده واحده
يا حلاوه يعنى الشعب المصرى اللى الأميه فيه فاقت المعدل العالمى و دخلت الموسوعات
بيتعمل له اعلانات بعشره مليون علشان يقرا
طيب مش يأكلوه الأول
طيب حتى يصلحوا مشكلة المياه
و لا بلاش يصلحوا حاجه
يا ريت حد يكافح الأسعار اللى بتزيد يوم ورا يوم
ولا حتى بلاش دى كمان
يا ريت بس يشيلوا الزباله اللى ماليه الشوارع
و بعدين ال50% اللى تحت خط الفقر. ايه رأيهم فى الموضوع ده
امية ايه و خط فقر ايه
بصراحه سوزان مبارك كتر خيرها مش كفايه عايزاكوا تقروا و تتثقفوا و يبقى عليكوا القيمه
مش احسن ما الفلوس تتصرف فى حاجات مش مؤثره
يعنى مش كده احسن ما نحل مشكلة المياه
و طبعا احسن من ان كادر المعلمين يطبق
هما كده كده بيدوا دروس بلاش يطبق
و لا لا قدر الله يتبنى بيها شقق لحل ازمة اسكان محدودى الدخل
محدودى الدخل ايه؟ ده حتى الريس بيقول ان محدودى الدخل دايما شاغلين باله
يبقى كفايه عليهم شاغلين بال الريس
كمان عايزين شقه
كتير كده
طيب و الناس اللى مش لاقيه تاكل؟
مش مهم تاكل المهم تقرا و كله هيبقى تمام
و بعدين شوفوا بقى ماما سوزان بتقول ايه: القراءه للجميع هى سبيل العداله الثقافيه
يعنى اخيرا هيبقى فى عداله فى مصر. الحمد لله انى شفت اليوم ده
و بعدين مين ممكن ينكر دور مشروع عملاق زى ده فى تنمية الثقافه المصريه
و الدليل ان الأحصائيات اكدت ان الفرد المصرى نصيبه من القراءه نصف كتاب فى العام
لأ مش معنى كده ان المشروع فاشل بالعكس
معنى كده ان من غيره كان نصيبنا ممكن يبقى ربع كتاب فى السنه
و لا حتى يمكن يصفى على صفحتين
posted by mariam @ 12:36 AM
43 comments
43 Comments:
انت زعلانة على عشزة مليون طيب خدى عندك
1- مجس الشعب اللى مالوش لازمة بيتكلف كام
2- مجس الشورى اللى عامل زى الاطرش فى الزفه بيتكلف كام
مواكب السادة الوزراء والسادة المحافظيين ومديرى الامن اللى كلهم مالهمش لازمة بتتكلف كام
اقول كمان ولا كفايه احسن يجيلك زاهيمر
والله العظيم ده استعباط..وده إن دل على شئ إنما يدل على سفه وإسراف، لأن شعبنا شعب منظرة ومظاهر وبس..وكان ممكن العشرة مليون جنيه دول يستغلوا في
تنضيف الشوارع المعفنة أو تحسين حال الشعب ولو شوية..الحمد لله رب العالمين على كل شئ ولا حول ولا قوةإلا بالله..
شكراً..
محمد المصري
بصي بقي يا مريم
لما اجيب عبد الله ابني
وملقيش ميه علشان يشرب ويستحمي
ولما ملقيش مستشفي حكومه يتعالج فيها لما يتعب
ولما ملقيش عيش بلدي وفينو أأكله
ولما ملقيش مدرسه نضيفه أدخله فيها
ولما الاقي نادي كويس يقدر يلعب فيه في الاجازه
ساعتها اوعدك بأمر الله وربنا يطول في عمري وعمرك
ابفي اخليه يقرأ
مش عايزين نبقى متحاملين قوى عليهم
هو الموضوع فى حد ذاته قيم
لكن لما يكلف 10 مليون
دى تبقى سرقة علنى
السلام عليكم
معتقدش ان فلوس الدعاية للحملة او حتى الحملة نفسها بتكلف الحكومة المصرية مليم
بيتهيألي ان كلها فلوس اليونيسكو والمعونة الامريكية
السلام عليكم
علي فكره الموضوع بتاع القرأة للجميع
كله هجص من الاخير عشان نبقي عارفين
فيه احصائيات بتقول ان نسبة القراة قلت من ساعات اما ماما ( ) مسكت المشروع وهو في فشل متزايد
وربنا يستر علي امخاخ الاطفال والكبار
مشكلة البلد دى ان مفيهاش تخطيط ماشية بركاوى كده على ما تفرج حتى حتى يعنى اذا كانوا عايزين يصلحوا يعنى نحسن الظن فبيشتغلوا بالبركة كده يعنى العشرة مليون دى هيقدروا مثلا يبنوا بيها مكتبات جديدة ولا اصرف على الاعلان ده وعرفش ابنى كتبات اللى بعمل عليها اعلان بالمبلغ ده دول ناس عندها عقل
طب دا اﻷعلانات اللي علي كوبري أكتوبر لوحدها كانت حلة أزمة الميه
دي عالم بتاعت مظاهر وكله أي كلام
لا فيه قرأة ولا غيره
بس اللي هاممهم إنه يبان إن الهانم بتعمل حاجة للبلد
تحياتي
وبعدين بقى في البوستس اللي ورا بعضها دي .. إنتي كنتي حاقدة على الناس اللي بيستحموا ودلوقت حاقدة على الأطفال اللي بيقروا كمان؟
يعني مش صعبان عليكي إن الأطفال العريانة المرمية في الشوارع دي وبتموت من الجوع والأمراض إنهم كمان فوق كل ده ما يقروش كتب؟ ده حتى يبقى حرام
فعلا يا مريم
انا لست ممن يعتبرون القر اءه ترفا
ولكن ضد المتاجره الا علا ميه بالمصريين وخداعهم اعتقد ان الدعايه هى موجهه لمن هم فى قصر العر وبه وليس للمصريين
يريدون رؤية مصر من منظور اخر غير مصر الحقيقه
مصر التى جوعوا شعبها
وسحقوا شبابها
وعطشوا اراملها
وملئوا شو ارعها
اطفال مجهولى النسب
يعيشون حياه الكلا ب الضاله تعيش افضل منهم
شعب متسول كرئيسه المتسول الاكبر على المعونه زرع فينا قيم الشحاته لا العمل
الانصر اف عن العمل الجدى الى عمل الشوهات
منهم لله يا مر يم
ربنا ينتقم منهم
كنت عا وز اكمل انا مقهور والله
سلا م
واحد من الشعب
لأ كفايه مفيش داعى
انا عارفه فعلا ان الشعب بياخد الفتات
ده لو خد حاجه اساسا
مش عارفه اقولك ايه
احنا ممكن نعد الفلوس اللى يتتصرف على الفاضى للسنه اللى جايه
شكرا لزيارتك
----------------------------------
محمد المصري
و لا تزعل نفسك
العشره مليون شوية فكه
العيب مش فى الشعب
الشعب لو عليه عايز ياكل
انت عارف العيب فى مين
منور
مـحـمـد مـفـيـد
هو ده اللى انا عايزه اقوله
انت طبقت عملى
صح فى اولويات فى حياتنا
يعنى مش ممكن واحد مش لاقى ياكل
و اعمله اعلانات بعشره مليون
كلامك دايما فى الصميم
--------------------------------
mo'men mohamed
صدقنى يا مؤمن انا مش ضد المشروع
يعنى لو مثلا حد قالى ان العشره مليون اتصرفوا على الطباعه
او الترجمه او النشر مثلا
و لا كنت هزعل الكتب مهمه فى حياتنا
لكن تتصرف على الدعايه هو ده المستفز
منورنى
Marvel
يعنى فلوس المعونه بتتصرف على الأعلانات؟
طيب ما نترحم من قرف المعونه
و بلاها اعلانات
مفيش فايده فى الناس دى
نورتنى بجد
---------------------------------
هاني جابر
نسبة القراءه فى مصر متدنيه جدا
و المشروع ده مش موجه صح
انا شايفه انه معمول من باب الوجاهه مش اكتر
اهلا بيك و شكرا لزيارتك
امام الجيل
فعلا مشكلة التخطيط ازمه فى مصر
و لو مثلا العشره مليون كانوا اتصرفوا على الطباعه و لا الترجمه كنا نقول ماشى
لكن تتصرف على الأعلان شىء مستفز جدا
فى بلد الناس مش لاقيه تاكل
شكرا لزيارتك
-----------------------------
The Alien
انا رأيى ان الموضوع ده معمول علشان الوجاهه
و قال يعنى بيعملوا حاجه مفيده
زى ما انت قلت كانوا يحلوا مشكلة المياه الأول و بعدين يعملوا اعلانات
هو كده كده المشروع مش ماشى بأعلانات او من غير
منور يا بيشو
يا مراكبي
عرفتنى على حقيقتى
ايوه انا بحقد عليهم
و متغاظه منهم
لأن الناس بيقولوا ان العباقره مش بيستحموا و بيقروا كتير
فأنا بقى حاقده عليهم لأنهم هيبقوا عباقره
منورنى دايما
-------------------------------
الجحيم
طبعا اتفق معاك يا محمد ان القراءه ليست ترفا
بل هى ضروره طبعا
لكن مثلا لو العشره مليون كانوا اتصرفوا على طبع الكتب و لا الترجمه و لا النشر كنا نقول ماشى
لكن تتصرف على الأعلانات
هنا بقى فى اولويات
على فكره انت قلت كل الكلام اللى احب اقوله و متفقه معاك جدا
الناس دى ضيعت البلد و باعتها و تاجرت فيها
ربنا يرحمنا
شكرا ليك بجد
سيبك من كل ده..عشرة مليون ده عشان الحملة الصغيرة دي الحملة لا تستحق هذا المبلغ..ثانيا أي قراءة دي ده الكتب بقت غالية نار..يعني اللي حيشتري يشتري عشا أو فاكهة لعياله ولا يجيب كتاب بعشر جنيه يقراهلهم؟
شكل تيزة سوزان كبرت وخرفت رغم إنها مخرفة من زمان0
على فكره بقى انا مش معاكى خالص
لان احنا كملنا من كل حاجه وماعدش فاضل غير اننا نهتم بالقرايه بس وايه يعنى لما يصرفوا عشره مليون فى الاعلان انتوا اعداء للثقافه على فكره
وعشان تبقى عارفه انه فى مصر الفقير اهم حاجه عنده انه يثقف نفسه ويجيب كل يوم جرنال بدل مايفطر
يعنى هيا جت على قد كده ياريت
بجد بجد اسلوبك رائع فى الكتابه
بحييكى
انا بدي اقولك حاجة حصلت معايا شخصيا
انا كنت مسافرة شرم الشيخ من كم يوم ولقيت هناك كل الشوارع مليانة بالدعاية متمشيش كم خطوة الا تشوف الاعلان
وبما اني مجنونة قراءة قعدت ادور على مكتبة خلال اسبوع ما لقيت بالاخر الا مكتبة وحدة وفيها ما لا يزيد عن عشرين كتابا والباقي مجلات غالبيتها اجنبية
فسؤالي كيف القراءة للجميع ولا نوفر لهم الكتب
ام كفاية يقراوا الاعلان
:))
تحياتي
اولا بما ان جيمي اتجوز يبقى نقول تيتة سوزان
اما بخصوص القراية للجميع، فدا موضوع يفقع المرارة. الناس دي مش حاسة بالشعب. دول لا في يوم جاعوا ولا عطشوا ولا شافوا حال المواصلات. اللي مش هيسرق في البلد راح يفقع مرارتك ببعده عن الواقع. اعلانات عجيبة وبوسترات غريبة لبلد غير بلدنا وواقع غير واقعنا
حسبي الله ونعم الوكيل
تحياتي
ده استهبال
يعنى ناس مش لاقيه تاكل ولا تشرب
و ده اللى يحصل
عماااااااااااار يا مصر
السلام عليكم
مانو
أنا ممكن أكون مختلف معاكي علي إنك بتقولي نوجهه الفلوس دي لمحدودي الدخل و التنمية
معرفش كلامي صح و لا غلط بس بجد الفلوس دي لو أتوجهت للقراءة بحق هتفيد أكتر من الأكل و الشرب
أقصد يعني لو أتوجهت كمية الإعلانات اللي مغرقين بها الشوارع و الكباري و كل عمود نور مش بينور لعمل كتب بجد و و طرحها للناس هيكون أفيد
إحنا مشكلتنا في الجهل مقصدش الشهادات
أنا شخصيا بكالوريوس علوم و شايف نفسي جاهل جدا جدا جدا بجد مش تهويل و لا كلام مجاملة
و بردوا ممكن يكون كلامي غلط و كلامك أنت اللي صح في توجيه الفلوس دي للمشروعات التنموية
معلش طولت عليكي
كل سنة و أنت طيبة بمناسبة غرة شعبان
سلام
يعنى ايه كلمة وطن
سؤال محتاج من كل واحد فينا اجابة
شاركونى برايكم
قلب أبيض
انت مضايقة نفسك ليه
يعني ده غلط ماما سوزان
انها عايزه تخليكوا تستفيدوا بوقتكوا في الاجازه
اظن ان فيه جزء من الفلوس فس دعم بعض الكتب
وكده كده الفلوس بتتسرق
لما تتسرق وتستفيد منها شوية
احسن من لما تتسرق من غير فايدة
كل دي ليست أكثر من حركات شو لسيده مصر المحروسه
تحياتي لكي
الحملة نفسها كويسه طبعا
تعالي ناخدها من ناحية تانية غير الدعاية .. في ما هو اسوا
سوق الكتب العشرة بخمسة جنية معرفش انا بيوجعني مش بيفرحني.. بالذات ان نص الكتب متكرمش ومتبهدل ونسبة الفقد ماتتخيليهاش
من كام سنة في الجامعة كان بيتعمل المعرض ده اوقات باخد الكتب علشان صعبانة عليا مش اكتر مش قادرة اقولك الكتب في الفاقد جنب الحيط اكتر من الكتب اللي بتتشري
نزود بقي كتب الاسترزاق مجموعة مقالات لصحفيين -ماعلينا من وصفهم- اتلمت واتعملت كتب، كتب في وصف الفن وتدريسة متتوصفش برضه الكتاب كله مثلا بيشرح نظرية واحده وبسطحية ظريفة جدا
في كتاب اسمه مدخل للنقد السينمائي بقالي سنة باحاول افهم عاوز ايه.. هاحاول افهم السنة دي ان شاء الله
التراجم كانت افضل مافي الموضوع وكانت كويسة، وتحسي ليها تخصصات. مسن بيترجم اليوناني اكيد احمد سخسوخ مين هيترجم روسي اكيد سامي الدروبي
ياريتها دااااامت
جبت ترجمة لريتشارد الثالث مكملتش 50 صفحة منها
الحاجة اللي تفرح بجد هي المجموعات الكاملة وكتب الموسوعات
دي لو عملنا ايه مكناش هنشتريها بالاسعار دي
المهم .. عن تكاليف الحملة فانا مش شايفة ان وجود يسرا في اول الاعلان واخرة وقبل زاهي حواس طبعا دي حاجة مفروغ منها وقبل سميحة ايوب كمان .. دي يسرا مش اي حد
فرق كتير في الحملة
كان ايه المشكلة في الاعلان بالخلفية الصفرا في الاهرام كل يوم
والله كنت بستناه كل يوم
لو يسيبوا المشروع علي حاله من غير اعلانات شيك هيجيب نتيجة افضل مع الوقت
معرفش عن دراسة نصف كتاب كل سنة دي خالص يا مريم.. لو الحال كده تبقي مشكلة
أحمد المصري
اهلا بيك يا أحمد
فعلا الكتب بقت غاليه
رغم انه يحسب للقرلءه للجميع انه بيوفر الكتب بسعر افضل شويه
المشكله بقى ان الفلوس مش بتتصرف على الكتب لكن بتتصرف على الأعلانات
نورت
---------------------------------
mohamed gado
اهلا بيك
بجد ضصحكتنى جدا
انا فعلا على طول بشوف اطفال الشوارع قاعدين ماسكين كتب و جرايد
و جنبهم ازازة الكله
و الشحاتين كمان على طول ماسكين كتب
احنا شعب مثقف
منورنى
yasmina
يا هلا فيكى يا ياسمين
اهلا بيكى فى شرم الشيخ و يا رب تكونى مبسوطه
فعلا يا ياسمين الأعلانات اكتر من المكتبات و الكتب
علشان كده بأقول يا ريتهم كانوا صرفوا على الطباعه او الترجمه او الكتب نفسها
بدل الأعلانات الفاشله
نورتينى جدا
-------------------------------
Samir
الناس دى مش عارف حاجه عننا فعلا
كل اللى يعرفوهم رجال اعمال
و ناس عايشه فى مارينا
لكن الشعب الحقيقى خارج نطاق الخدمه
منورنى
catroz
هو ده بالظبط
اللى انا عايزه اقوله
لكن لا حياة لمن تنادى
شكرا لزيارتك
نورتنى
------------------------------
No Fear
اهلا بيك يا محمد
على فكره وجهة نظرنا مش مختلفه
انا و لا كنت هعترض لو الفلوس اتوجهت لترجمة الكتب او الطباعه او النشر
لكن تتوجه للأعلانات هو ده اللى بعترض عليه
وجهة نظر سليمه
قلب أبيــض
شكرا جدا لدعوتك دى
و ان شاء الله هشارك معاك
--------------------------------
انا محمد الأنصاري
و الله عندك حق
على الأقل نشوف بعنينا
فلوسنا بتروح فين
و اهى تترصف على الأعلانات
بدل ما تروح سويسرا
نورتنى
micheal
واضح ان القصه كده فعلا يا مايكل
خليهم يفرحوا
منورنى جدا
--------------------------------
saso
منوره يا ساسو قبل اى حاجه
المشروع نفسه قيم
رغم بعض الأخطاء
لكن وجهة نظرك متفحصه و صحيحه
المشكله اننا متعودين ان كل حاجه حلوه بتتبهدل بعد شويه
بالنسبه لمشكله الكتب المتبهدله
انا بقول لو فلوس الدعايه كانت اتصرفت على الكتب من حيث الطباعه و الترجمه و كده
كانت تبقى هى دى الفايده فعلا
نورتينى جدا
Dear Mariam,
Fiurst how are you my dear? I heard a bout this project since i live in egypt 1995, and it sitl going on, it a nobel goal to let people read but people must do it by themself because they like it or they are interested in what they read, in the countries where the peoeple ahve high level of live, like USA, west europe and Japan, read a lot, what i want to say reading is a great but it ios not the first what the people do, if they do not have enought to eat to drink, about 50% in egypte si uneducated how can you aske this people to read. First uoy have free peoples minde. I saw a picture today of the child 12 years old has deid in the police station, where are the Imams in egypt and people like amer khaled , is that not imortant egouht to talk about, is that less important than Higab or nikab or what teh women must dress, is that not importand enoguht like eating with the right or left hand, or entering with right or left feet. My God you know who is right and who is wrong, i do not trust any imam or sheik any more they are misusing the religion. My dear soory that i write so long,have a nice day
Sherif
انا عايزة جلدة الكتب لو سمحت
يا سيتي غني ومين هيسمع
دة الموال وجعني
ولا حتي صوته بيطلع
هي جت علي دي
دة في بلاوي اكتر واكتر
مانو
عيب عليكى
الشعب الجعان ياكل ؟ ما عنوا ما كل
يسكن ؟ ما عنوا ما سكن
يتعلم ؟ ما عنوا ما تعلم
يتعالج؟ ما عنوا ما تعالج
يتجوز ؟ لالالا عيب دى مسائل شخصية ملناش دعوة بيها
اما بقى تيجى على القراءة لا والف لا
نجوع ونموت ونجهل ونتعرى ولكن لا نتوقف عن الثقافة والقراءة
احنا حيلتنا حاجة غير لسانا يعنى كمان مش عايزاه ينطق كلام مثقف
هما العشرة مليون دول ادامهم كام صفر اصلى ضعيفة فى الحساب كنت بركز على الثقافة بس ايام الدراسة والبركة فى ماما سوزان احنا لينا مين غيرها
يلى اعتذرى ليها قلب الام لو غضب عليكى ايامك لونها هيتغير وانتى متعرفيش امن الدولة قصدى قلب الام بقى
:)
أختي الفاضلة
وفقا للتاريخ المصري في الثلاثة عقود الماضية
أثبتت الحكومة - مننكرش - أن مشروع القراءة للجميع نجح على مدار السنوات الاخيرة تحديدا
بس انتوا ليه مش بتنطقوا اسم المشروع كامل ؟
مشروع قراءة الكف للجميع
مريم انا باصتلك تاج حاولي تجاوبي عليه
لو سمحتي00هما تاجين بصراحة..ماشي؟
سلام0
شئ يحزن جدااااااااا
حسبي الله ونعم الوكيل
مانو العزيزه
وحشتينى اوى جدا والله
بقالى يجيى 4500 سنه مدخلتش عندك ولاقريت بوست يجبلى اكتئاب اكتر من اللى عندى
المهم يعنى ادخل فى الموضوع
ايه ياستى اللى مزعلك فى ال 10 مليون اللى ادفعوا
دول اقل حاجه عندنا
نطلعهم على الجزمه بس الناس تقرا
واحنا يهمنا ايه غير سعاده الكتاكيت الصغيرين المقطقطين اللى هما امل النهارده وشمس بكره وفى المستشفيات بيموتوا بعد بكره
عادى ياستى مصر كلها ماشيه كده
الناس تقرا وهى مش لاقيه تاكل
وتتثقف علشان تشبع
والقرايه ايه غير غذاء للعقول ولا انتى نسيتى
هى اه اتغيرت شويه عن زمان بس اكيد لسه بتشبع
المهم ياستى ولا تضايقى نفسك خالص ليكى عليا اكلمك ماما سوزان تطلع كمان 10 مليون علشان الناس اللى مش قادره تشرب تجيبلهم ميه معدنيه
وبعدين سؤال يطرح نفسه دلوقتى ولو انه سؤال خبيث
ترضى تاكلى الاكل المسرطن اللى اترش مبيدات حشريه ولا تاكلى كتب نضيفه وورقها حلو وملون كده؟
هاستنى الاجابه ضروروى
باى
Sherif
welcome sherif
i'm fine and thank you for your care
i agree with you
we need to free our minds
i saw those awful pictures
i agree that we didn't menshion the needed care and attention for such subjects
waiting for you always
---------------------------
smraa alnil
اتفضلى جلدة الكتاب
و لا تغلى عليكى
ايوه عندك حق
فى بلاوى اكتر من كده كتير
منورانى
tota
توتا العزيزه
بفرح لما الاقى اسمك
لأن رأيك دايما بيعجبنى
لكن كله الا امن الدوله قصدى قلب الأم
انت عامله لى كمين و لا ايه
انا مش هتكلم غير لما ييجى المحامى بتاعى
رأيك صحيح طبعا يا توتا
-----------------------------
علوة
اولا اهلا بيك
شكرا انك فكرتنى بالأسم الكامل
لأنى كنت نسيته
طبعا احنا بلد الرياده
شرفتنى
أحمد المصري
التاج اتجاوب عليه
انت تؤمر
شكرا ليك جدا
------------------------------
صاحب البوابــة
شكرا ليك
و ده حال حاجات كتيره فى مصر
شرفتنى
rony
اهلااااااااااا رونى
وحشانى موووت
فينك و عامله ايه
ممكن لما تكلمى ماما سوزان تستلفي لى منها 20 جنيه
اما بالنسبه لسؤالك الخبيث
فأنا قررت اعمل ريجيم و مش ناويه آكل
اجابه اخبث من السؤال
نورتى جدا جدا جدا
حقيقي يا مريم موضوع جميل وبجد هادف ياريت الاستمرار
jinja
حقيقى اشكرك على رأيك
اكيد ده يشرفنى
Post a Comment
<< Home