Sunday, August 05, 2007

يا ناس كفايه حموم بقى حرام عليكوا


فضحتونا امام العالم. و شوهتوا صورة مصر على الفاضى
هنا ناس تطلع بجراكن. و هنا ناس مستنيه الفناطيس
و هناك ناس بتموت بعض على المياه. و ده غير اللى بيشربوا من الترعه
و طول الوقت يغلطوا فى الحكومه و فى البنيه التحتيه
رغم ان البنيه التحتيه دى هى الأنجاز الوحيد للعهد المبارك اللى احنا فيه
لدرجة ان فى ناس بتقول عليه عصر الكبارى و المجارى
يعنى مش كفايه ان الناس دى هى السبب
لأ و كمان بترمى بلاها على البنيه التحتيه
اقولك ازاى
السيد محافظ الدقهليه الهمام فلتة عصره و اوانه
اكتشف و هو قاعد فى التكييف بعد البحث و التمحيص و استشارة الخبراء الأجانب
ان العيب فى
لأ مش فى البنيه التحتيه
و لا فى المواسير
العيب ان الناس بتستحمى كتير
يعنى البنيه التحتيه براءه. و النهارده فرحى يا جدعان
مش فاهمه ازاى الناس تعمل كده
على آخر الزمن بيستحموا
و الحكومه ازاى تسيبهم يستحموا؟
و فوق كل ده كمان الناس راحوا يقابلوا المحافظ
لكن طبعا رفض لأنهم مش على جدول مواعيد سيادته
طبعا.... النهارده يطلبوا يقابلوا المحافظ بكره يطلبوا مقابلة الوزير
بعده رئيس الوزراء و مش بعيد رئيس الجمهوريه
و تبقى البلد خربت..... آدى آخرة الديمقراطيه
انا من موقعى هذا اطالب بالأعتقال الفورى لكل من تسول له نفسه بالأستحمام
و يا ريت اى حد يشك ان فى حد بيفكر التفكير الأجرامى ده يبلغ السلطات فورا
و هيكون ليه مكافأه معتبره
هيدخل سحب على قله و دش و ازازة مياه معدنيه
و الجائزه الكبرى فنطاس هديه
و اطالب كل الهيئات الأذاعيه بحظر اذاعة اغنية الطشط قاللى
لأنها تحمل بين سطورها ما يدعو للأرهاب اللى هو الأستحمام
انتهى البيان

44 Comments:

At 5/8/07 12:31 AM, Blogger aleron said...

لو المسؤولين عندهم دم

ينزلوا يركبوا أتوبيس نقل عام أو عربية فى المترو

و ساعتها فعلا حيعرفوا الشعب بيستحمى ولا لأ :)

تحياتى daylight

 
At 5/8/07 12:39 AM, Blogger smraa alnil said...

هههههههههههههههههههه


انا قلتلهم وانا صغيرة في مرة انا مش بحب الحموم

عشان تعرفي بس اني مواطنة صالحة من صغري

وبعدين ما احنا بنستحمي في رقنا كل يوممن الحر
هي الناس دي عايزة ايه غير كدة

يلا
الشعب عمره ما هيفهم

 
At 5/8/07 12:40 AM, Blogger smraa alnil said...

اه نسيت اقول ان البنية التحتية هي فعلا اهم حاجة
لان من غير النية التحتية الناس مش هتعرف تقعد

 
At 5/8/07 12:53 AM, Anonymous Anonymous said...

بنيتى بنيتك البنية دى بتاعتنا كلنا

 
At 5/8/07 3:03 AM, Anonymous Anonymous said...

ana kont nawy afta7 al mawd3 da men zaman we abda2 7amlet la ll7emom t7t kyadat al faze3 7mah allh wa 3lah al mo7afez
2ol ma3aya ya masry kfaya (7aram)2sdy 7emom
looooooooooool

 
At 5/8/07 11:38 AM, Blogger Samir Saad said...

يخرب بيت البلد. ايه دا ياجدعان. بجد حاجة تقرف انا مش قادر اتصور الموضوع دة. المسئولين دول خلاص مافيش دم ولا احساس.
غلطان اللي يفكر يعيش في البلد دي. بجد انا نفسي اسيبها.

على فكرة اسلوبك في البوست ظريف أوي

تحياتي

 
At 5/8/07 12:14 PM, Blogger مـحـمـد مـفـيـد said...

بصراحه يا مريم
انا لسه جاي من السفر لقيت الدنيا خربانه
ربنا يرحمنا

 
At 5/8/07 9:29 PM, Blogger انحلت سيور العربه وسقط المهر من الاعياء said...

مريم

والله منظر الفناطيس والجر اكن بين نظام مبارك ع حقيقته بوجهه الحقيقى نظام طالما افتخر بالبنيه فاين هى البنيه التحتيه؟
التى صدعونا بيها
انهم عاجزون عن توفير كوب الماء للمواطن اما موضوع الحموم
فهى امنيه بعيدة المنال اصلا
الافى الترع بالطبع

تحياتى

 
At 5/8/07 10:14 PM, Blogger أحمد المصري said...

طب ما يبطلوا هما حما ويريحونا عشان نعرف نشرب..ماهم حيوفروا برضه لو بطلوها..هما كده كده مش نضاف أساسا0

 
At 5/8/07 10:56 PM, Blogger No Fear said...

السلام عليكم
أحلي حاجة في البوست أنك كتبتي بأسلوب جديد مش أسلوبك خالص
فعلا حقيقي المثل
هم يبكي و هم يضحك
و شر البلية ما يضحك

علي فكرة كنت قريت زمان إن مصر من الدول اللي نسبة أستهلاك الفرد للمياه فيها أقل من متوسط الإستهلاك المطلوب للأنسان أصلا
و بلد النيل أومال اللي معندهمش نيل بقة بيعملوا أية

 
At 5/8/07 10:57 PM, Blogger No Fear said...

جامد قوي تعليق سمرا التاني ده
:)

 
At 5/8/07 11:16 PM, Blogger mo'men mohamed said...

الناس من كتر ما بقت بتستحمى
المواسير و المجارى اتسدت من الجلخ اللى بينزل منهم
يبقى هما السبب
السلام عليكم

 
At 6/8/07 11:36 AM, Anonymous Anonymous said...

Dear Mariam,

It realy unbelieveble what is goino in egypt about that the water issue, i do not understand it. The egyption goverment has sold everything banks and manufactorys where all that money goes to? They must use it for such basic things, waterinfrstraction, building roads and bridges , it happens in the all world. The basic needs for the people must garanted by the goverment, basic needs means, education,healthcare,social care. the last 25 years we have heard the same song about the infrastraction hwich has been build during Presiden Mubarks and now. i have heard last week the the desert roal between cairo and ALex wil be free road where you can drive 120 km houre, they have to dit 30 years ago, my god help us please. have a nice day my dear.

Sherif

 
At 6/8/07 4:04 PM, Blogger mariam said...

aleron
لأ صعب قوى يكون عندهم دم

يركبوا اوتوبيس؟
طيب يسيبوا المواكب لمين

شكرا ليك و منورنى


---------------------------------
smraa alnil
طول عمرك يا سمرا بتدورى على
مصلحة الوطن
حموم ايه و كلام فارغ ايه
نقول ايه شعب مش بيقدر النعمه

و بعدين حد يقدر يغلط فى البنيه التحتيه
طيب دى مهمه جدا
منوره يا انووج

 
At 6/8/07 4:06 PM, Blogger mariam said...

واحد من الشعب
يا ريت كانت بنيتنا كلنا
يمكن كل واحد كان ياخد بنيته و يخلع
شكرا لزيارتك


-----------------------------------
sa3ed al masry
انا شايفه اننا نهتف بأعلى صوتنا
كفاااااايه حرااااااااام
كفايه حموم طبعا
اكيد مش قصدنا على حاجه تانيه
نورت

 
At 6/8/07 4:11 PM, Blogger mariam said...

Samir
لأ موضوع الدم ده
معروف من زمان
انه صعب تلاقى عندهم دم
لكن ارجوك بلاش تفكر انك تسيبها
لأننا لو سيبناها هتخرب اكتر
شكرا على ذوقك
و منورنى


---------------------------------
مـحـمـد مـفـيـد
الف حمد الله على السلامه
عمره مقبوله ان شاء الله
و ذنب مغفور
سيبك من كل ده
المهم انك رجعت بالسلامه

 
At 6/8/07 4:15 PM, Blogger mariam said...

الجحيم
اهلا بيك يا محمد
طبعا موضوع البنيه التحتيه متاجره بينا
و لأخفاء النصب و السرقات و الفساد
فأى فلوس يقولوا اتصرف البنيه التحتيه
لكن هما اتكشفوا

انا سعيده جدا بعودتك و انك عدت للتدوين مره اخرى
و فتحت بلوج الجحيم
حمد الله على السلامه



--------------------------------
أحمد المصري
اعتقد ان هما
مش بيستحموا من الأساس
و ده ظاهر عليهم
مفيش فايده
منورنى

 
At 6/8/07 4:22 PM, Blogger mariam said...

No Fear
و عليكم السلام و رحمة الله
فعلا ده مش اسلوبى
بس اعمل ايه
خرجونى عن شعورى
فعلا تخيل ان الناس بلد النيل
مش لاقيه تشرب
منهم لله
فعلا تعليق سمرا فى الصميم
منورنى يا محمد


------------------------------
mo'men mohamed
فعلا يا مؤمن
الناس الوحشين هما
السبب
آدى اخرة الحموم
منورنى

 
At 6/8/07 4:28 PM, Blogger mariam said...

Sherif
welcome sherif
really egypt is going from a worse situation to a worst one.
egypt has been completely destroyed in the last 25 years.

i wish God help us. because we are going to a dark road by this way.

thank you sherif

 
At 6/8/07 7:23 PM, Anonymous Anonymous said...

لا بجد السيد المحافظ المبجل اللى تحت التكييف حاسس بالام الناس وزشعورهم لانه منهم ده طبعا مش كلامى ده الكلام اللى بيتقال فى التليفزيون ضحك على الدقون لكن ساعة الجد الكل يخلع ويبقوا الناس هما السبب فى كل بلوى ونهيبه ولو طالوا يشيلوهم مسئولية انفجار النيازك وهيروشيما ونجازاكى هيشيلوهم

 
At 6/8/07 7:57 PM, Blogger saso said...

امبارح باين كان طلعت السادات بيقول الكهربا بتيجي ساعتين في اليوم
وارض زراعية اتمنعت عنها الميا علي اساس ان بعض شباب المستصلحيت باعوا ارضهم فقرروا يعاقبوا اللي ماباعوش بالمرة
وقري مفيهاش ميا والحل فناطيس ميا دايرة وكمااااااان مش نقية

ايه الصعب في تاجيل خط المترو الجديد وحفلات ليالي التليفزيون -الخسرانة - وحمي تطبيق الكادر علي الموظفين لحد مايخلص توصيل المياة الاول

وليهم نفس يتكلموا عن الانجازات في العشرين السنة الاخيرة

---
مريم
اول مرة القاكي كده
ضحكتيني في وسط قسوة البوست بكلامك

 
At 7/8/07 9:59 AM, Blogger The Alien said...

أصل المحافظ دا لواء جيش
زي أغلب المحافظين ف بلدنا
ودول ناس متعودين علي موضوع قلة الميه والحموم
عارفة إنتي ف الجيش الوضع بيبقي عامل إزاي
عشان كدا تلاقيهم مش فاهمين الناس بتشتكي ليه

زي محافظ أسيوط قبل كدا لما بيوت الناس وقعت
طلع يقوم إنهم الغلطانين وبانيين مخالف من 50 سنة
وقام عملهم محاضر

تحياتي

 
At 7/8/07 1:40 PM, Anonymous Anonymous said...

Dear mariam, the alien,

indeed all myers of the egyption cities are ex generals in the egyption army, they become governuers not because they god for the job but because they are trusted by the goverment, they are keeping each other powerful. i am gonna tell you a story , i have seen it by mu own eyes, two years ago the footbal worldcampionship for under 21 years had taken place in Holland and luckly teh egyption team played in teh city i live Encshede near to the german border, any way my egyption friends and i went dirctly to the hotel where they stayed, the coach Mohamed radwan ex player of Mekawlien AL Arab and Motamed Gamal ex zamalk player his assistent. when you saw the way they traind, it was really nothing, Mohamed radwan befor every game telling the players something which has nothing with footbal to do for exampel, some thing like nation songs or something that which does not helpof course we lost all matches, and the head of the egytion felegation was also aan ex general and the words he used agianst the players unbeliveble, if one of the players was missing a chance then shout the ex general in arabic mother fucker what are you doing, i said to the egyption friends he must not use the words he used in the Army hhhaaa, sorry for mentioned such bad words, have a nice day

Sherif

 
At 7/8/07 2:38 PM, Blogger micheal said...

ااااااااخ
المحافظ نسي كمان تحريض الموساد و المؤامره الامريكيه لتحريض الناس علي الاستحمام حتي تحدث مشكله المياه مما يحرج النظام المصري و مين عارف يا مريم مش جايز يمون اللي بوظ شبكات المياه و المجاري هما الاخوان و ذلك لتعطيل فكر الحزب الوطني جدا الجديد
:)
تحياتي

 
At 7/8/07 2:57 PM, Anonymous Anonymous said...

Hi Micheal, how are you my dear

A funny comment you write really lovely have a nice day my dear

Sherif

 
At 7/8/07 10:48 PM, Blogger tar7elba7r said...

و ليه ناكل و ليه نشرب وليه نربى العيالو اما العلاج غالى طب ليه بتاخدو الدوا...ليه تستحمو و تنضفو
ماعرفش ليه
بتتوضو علشان الصلا
ملوش لالازمه تتوضوا
و لا تصلو
بلا تعليم بلا مجان
بلا دياولو
انا الغلطان

 
At 8/8/07 12:30 PM, Anonymous Anonymous said...

انا قررت أنضم لطائفة السيخ فى الهند
بماانهم يحرمون الاستمحمام الا مرة واحدة فى السنة بس

علشان تبقا شرعى

 
At 8/8/07 2:54 PM, Blogger sarah la tulipe rose said...

ما هو ان لم تستح فاصنع ما شئت هو قاعد في التكيف شبعان و شارب مية معدنية و مش هامه حاجة
ما هو دة الانجاز الي فرحانين بعد 26 سنة مباركة من البنية التحتية الي بقت فوقية و المجاري طلعت في الشوارع ..حتي الحاجة الوحيدة طلعت بايظة و الله ربنا يستر علي الفترةالجاية

 
At 8/8/07 11:08 PM, Blogger Dr. Tantawy said...

انا بوصفى مواطن مصري غيووور على وطني اعلن و بكل وطنيه و شجاعه اني هبطل استحمى و اكون انسان جديد ههههه

يالا عن ما حد نظف ولا استحمى .. فيها ايه لما نعيش معفنين .. من التراب خلقنا و الى التراب نعود .. وحدوووووه

 
At 10/8/07 7:56 PM, Blogger mariam said...

hend
الراجل كتر خيره
عمل اللى عليه و زياده
العيب فينا
آدى اخرة الحموم
نورتينى


----------------------------------
saso
اهلا بيكى يا ساسو
طولتى الغيبه علينا
حمد الله على السلامه
انا شفت حوار طلعت السادات
لكن معقول يلغوا حفلات ليالى التليفزيون
و يأجلوا خط المترو
و بعدين الأنجازات موجوده بس احنا مش واخدين بالنا
نورتى يا جميله و ياريت متغيبيش عنا

 
At 10/8/07 8:00 PM, Blogger mariam said...

The Alien
ده العادى بتاعنا يا بشوى
هات لى مسئول فى مصر بيعترف بغلطه
كله شايف ان الناس هى اللى غلطانه
احنا اتعودنا على كده
منور


-----------------------------------
Sherif
you are right
i think the civil life in egypt is in a very bad situation.
thank you for sharing.
that is your blog

 
At 10/8/07 8:03 PM, Blogger mariam said...

micheal
انا قلت من الأول لازم نعرف
مين اللى وراء المؤامره دى
لكن احنا استنينا لغاية تفاقم المشكله
على آخر الزمن الناس بيستحموا
حاجه غريبه

نورتنى بجد


------------------------------
Sherif
welcome again

 
At 10/8/07 8:06 PM, Blogger mariam said...

tar7elba7r
لا لا انا اللى غلطانه
مفيش داعى للحموم و لا الأكل و لا الشرب
و لا حتى الصلاه
مش مهم
الحكومه ميه ميه
احنا اللى غلطانين
نورت و شكرا لزيارتك


-------------------------------

شـــــهــــروزة
اهلااااااا شوشو
و ليه مره واحده فى السنه
بلاها خالص
مفيش حموم من اساسه
لكن هو الأشتراك فى السيخ بكام؟

 
At 10/8/07 8:10 PM, Blogger mariam said...

This comment has been removed by the author.

 
At 10/8/07 8:11 PM, Blogger mariam said...

sarah la tulipe rose
اهلا يا ساره
ايه يا بنتى الغياب ده كله

بلاش تقلقى ربنا هيستر ان شاء الله
لأن كل حاجه خربت خلاص
هو ده الأنجاز
ايه رأيك بقى
نورتيينى


-----------------------------
Dr. Tantawy
و ايييييييييييه
تانى مره تألف لشعبان
انا هبعتله و اقوله يشترى منك الأغانى
بس ابقى افتكرنى ساعتها بقى

احيي فيك الوطنيه و الشجاعه
انك تبطل الحموم
و ادعو كل مواطن غيور على وطنه
ان يحزو- حلوه يحزو دى- حزوك
لا اله الا الله

منور

 
At 11/8/07 12:54 AM, Blogger محمد الوكيل said...

لا يسعني أن أقول..حسبنا الله ونعم الوكيل..ومفيش فايدة!!
شكراً..
محمد الوكيل

 
At 11/8/07 4:14 AM, Blogger LAMIA MAHMOUD said...

يا بنتي دي حملة للتقشف عشان يعلموا الشعب يعيش بابسط الادوات والظرووووووف

 
At 11/8/07 12:45 PM, Blogger spellz said...

مسخرة :]
مش قادرة افهم اذاى دماغ المحافظ العبئرية
العبئرية يعنى جابتله الفكرة د
على رأيك اكيد فى الموضوع خبراء اجانب

الحل الوحيد ان احنا نعمل اضراب عن الحموم و نشممهم ريحتنا
و ساعتها هيستوردوا مياه و يتحايلوا علينا

 
At 11/8/07 10:38 PM, Blogger momken said...

ويستحموا ليه انجننوا دول ولا ايه هو الدنيا حر ولا حاجه ميستحملوا شويه
وبعدين الى عاوز يستحمى لعذر شرعى ممكن يتيمم اه نوفر الميه علشان حجات اهم
نسقى بيها الجناين فى الميادين العامه
او اقولك اهى الميه مغرقه السودان نعمل رحلات مدرسيه للخرطوم اهو العيال تستحمى وتتفسح
وممكن كمان نمنع بيع الصابون والشامبو فى محافظه سيادته علشان منخليش حاجه تغريهم على الحموم

ال يستحموا ال ناس معفنين

حسبى الله ونعم الوكيل

تحيتاتى

 
At 11/8/07 11:47 PM, Blogger mariam said...

محمد المصري
اهلا بيك
و مبروك افتتاح المدونه
فعلا مفيش فايده
نورتنى


------------------------------
LAMIA MAHMOUD
اهلا يا لمى
منوره جدا
شوفى الشعب المصرى مش محتاج حمله للتقشف
لأنه متقشف من غير حاجه
منوره يا جميل

 
At 11/8/07 11:49 PM, Blogger mariam said...

spellz
اهلا بيكى
و الله دى اعلى درجات
العبئريه
اصل مش اى حد يبقى عبئرى لكن ده عبئرى فعلا
يلا نضرب عن الحموم
رغم ان مفيش حاجه هتأثر فيهم
منوره


---------------------------------
momken
هو ده االى بقول عليه
على آخر الزمن بيستحموا
مش عيب
ناس معندهاش دم
نورتنى

 
At 22/8/07 7:23 AM, Blogger jinja said...

انا من بكره مش هاستحمي عشان ما يبقاش ليهم حجه

 
At 23/8/07 2:18 AM, Blogger mariam said...

jinja
ايوه كده
انت كده اصبحت مواطن صالح
بس بلاش تقلق
اكيد هيلاقوا حجه تانيه
منورنى بجد

 
At 2/9/19 1:49 PM, Blogger yanmaneee said...

off white
curry 4
hermes handbags
nike air max 90
louboutin shoes
yeezy boost 350 v2
air jordan
longchamp handbags
balenciaga shoes
louboutin shoes

 

Post a Comment

<< Home